Цаппара гьантрал хьхьичI на най уссияв ЧIяйнна-Арих. Ва ар дуссар Хъюйннал, ЧIяйннал ва Ваччиял шяраваллал дянив, Хъун-Неххал ялув. Шикку шяраваллаву колхозру дусса чIумал хъуру дугьайсса аьрщи дикIайва. Утти ва ар кIура дарну дур ххалазаннуйн. Арнил лултту чулийсса жегъирххуллийх наниминнал янилунгу дагьлан дикIай, хъинну дакI тирх учин дуллалисса, личIи-личIисса тIутIал исвагьишивуртту.
Ттунгу ва кьини, ваниннин янилун къадагьлай диркIсса, ттула оьрчIнийрасса, маз нацIу бувайсса, «ЦIупI чай тIутIив» янилун дагьуна. Гай цирдагу чагъираву дия, цала чурхру майшан тIутIийни кунна. Бунияла, ца-кIира тIутIал хъахъисса «цIунну» цIуп учайхту, нацIушиву зумув хIасул хьуна. Ттун ва нацIушиву арияту Ваччав ияннингума асар хъанай дия. «ЦIупI учай тIутIайн» оьрус мазрай дур кIира цIа – «Буквица» ва «Мытник Кауфмана» тIисса.
Хъун дяъви къуртал хьуну махъ бувсса оьрчIан тай шиннардий муксса «лякьлун хIурмат» бувансса дахханашивуртту, чанну дакъа, къадикIайва. КIут-кIучIалу, къурнил нувщи канакисса чIунну дикIайва. Ахъулссагу муксса чIярусса къадикIайва, нажагь нину-ппу Гъумукун базаллувун лавгний ларсъсса дакъа. Мунияту ттунгу дакIний лирчIуна ва «ЦIупI учай тIутIал» нацIушиву.
Арнил урттуву ляличIинува щюллину ва исвагьину янилун багьлай бия хIухчил чIапIивгу. Ми чIапIив инсаннан дарув-дарманну шайшивугу буслан бикIай. Нагу ишла бувара хIухчил чIапIив, кьакьан бувну.
Ва кьини ялагу на ябитлай уссияв Ваччату лавсъсса, Шри-Ланка тIисса паччахIлугърай итабавкьусса, чяйлул пачкалух. Гьай-гьай, чяй тайнначIа цачIара къуршилувун дирчуну дакъая. Гай дия жучIара, Аьрасатнаву, «расфасовать» дурну. Вай хьхьирил жамирдай ягу муххал ххуллийх дучIайхьунссар. Ттунгу ва лахIзалий дакIнийн багьуна ЧIяйнна-Арив хьунабавкьусса хIухчил чIапIив ва цаймигу дарув-дарманнуну хъанахъисса ххяххияртту.
Найнма бур ихтилатру шяраваллава инсантал чан хъанахъавриясса. Амма инсантал шийва цIакь бувансса ишруми щилчIав щаллу буллай бакъар. Иширах бургарча, хIукуматрал ва давугу дуван кунна чIалай дакъар.Ттул ацIра шин хьунни шагьрулия шяравун ивзун. Вай шиннардил мутталий цаягу инсаннан зунсса цIусса кIану Ккуллал райондалий хIасул хьусса ххай акъара. Циванни къабучIисса Лакку билаятрал буруккинттарайсса ишбажаранчитуран, вай дарув-дармансса уртту гъинттул датIлай, кьакьан дуллай, ххуйсса суратру дирхьусса коробкарттаву аптекирттайн даххан дуллан.
Чув буру зу, Лакку билаятрал буруккинттарайсса патриотътал?
