Аьрасатнал усттартал Дагъусттаннай

Июньдалул 29-нния июльданул 2-ннийн бияннин хьунтIиссар Аьрасатнал усттартурал Дагъусттаннайсса «Усттартал ва чагуртътал» («Мастера и подмастерья»)тIисса цIанилусса ярмукIа. Ва хьунтIиссар Аьрасатнал ва Дагъусттаннал Культуралул министерстварттал кабакьаврийну ва «Аьрасатнал культуралул фонд» ООГО-лул грант ишла дурну.

ЯрмукIалий гьуртту хьун жулла республикалийн бучIан­тIиссар Башкортосттан, Марий Эл, Ингушетия республикарттаясса, Ставрополлал крайраясса, Липецкаллал, Воронежуллал, Свердловскаллал областирдаясса, Ханты-Мансийск шагьрулиясса фольклорданул коллективру. Мукунма гьуртту хьунтIиссар жулламур республикалул шагьрурдаясса ва районнаясса коллективру. ЯрмукIалул хьхьичIсса агьамми мурадру бур халкьуннал искусство, культуралул аьдатру, Аьрасатнал чIяву миллатирттал ляличIишиву дуруччаву, махъа нанисса ник халкьуннал культуралухух гьан даву.

ЯрмукIалийн тамашачитал хIисаврай бувкIминнаща бюхъантIиссар личIи-личIисса миллатирттал канил пишар­дащал, аьдатирттащал, ба­гьу-бизулущал кIул хьун, де­коративно-прикладной искусствардал журардал мастер-кла­ссирттай гьуртту хьун.
Байрандалул лагрулий Ма­хIачкъалалив ва Дарбантлив хьунтIиссар усттартурал каруннил дурмунил выставкарду, мастер-классру, ккуркки столлу, халкьуннал костюмрал байран-дефиле, фольклорданул коллективирттал концертру.

Уку-укунсса шадлугъирттал махъа нанисса жагьилтал гьуз учин бувайссар буттал улклул тарих, культуралул аьдатру, халкьуннал багьу-бизу лахьлан.