Ца уттигу бюхттулсса шачIану

Хирург-стоматолог, медициналул профессор, Ибрагьиннул арс Сяъдуллагь Абакаров хьунни Аьрасатнал Элмулул академиялул член-корреспондент.

Сяъдуллагь Абакаровлул хьхьичIуннайшивурттая уттинингу чивчуну буссия жула кказитрай. Сяъдуллагьлул Дагъус­ттаннал мединститутгу къуртал бувну, бувккуну бур аспирантура. Ччясса мутталий кандидатшиврул диссертациягу дурурччуну, зий ивкIун ур Аьрасатнал медакадемиялул профобразованиялул стоматологиялул кафедралий. Шикку, ассистентшиврия айивхьуну, хьуну ур кафедралул каялувчи, медициналул элмурдал доктор, стоматологиялул факультетрал декан.

[dropcap]Э[/dropcap]лмийсса хъиривлаявурттайн ва цIу-цIусса методирттайн бувну ккарччив хъин даврийну архIал зузиминнал ва цала учениктурал дянив хъиннува машгьур хьуну ур.
ХIакьину профессор Сяъдуллагь Абакаров хъанай ур Элмийсса медициналул сообществалул хьхьичIун лавсъсса, Аьрасатнал Федерациялул яла хьхьичIунми стоматологтуравасса ца. Ва ур хъинну чIярусса элмийсса давурттал, стоматологиялуву дурсса цIушиннардал автор.

Ванал каялувшиндаралу сакин дурсса цIу-цIусса технологияртту зузи дуллай бур стоматологтал.
Цува Аьрасатнаву захIмат буллай, ялапар хъанай ухьурчангу, ванан тачIав хъамакъабитай Дагъусттан. ЦачIанма Дагъус­ттанная бувкIсса цикссагу инсантуран ка-кумаг бувай.
ХIакьину ва ур федерал даражалийсса элмийсса интеллигенциялувасса ца.

Лакрал бакъассагу, щалагу Дагъусттаннал миллатир­ттал пахруну хъанахъисса Сяъдуллагь Абакаров барча уллай, гихунмайгу тIайлабацIуртту чIа тIий бур ЦIуссалакрал райондалул жямат.


Барча уллай буру

Вай гьантрай медициналул профессор Абакаров Сяъдуллагь Ибрагьимович хьунни Аьра­сатнал Элмулул академиялул член-корреспондент.
Стоматологиялул элму хьхьичIуннай давриву ванал хъунмасса бутIа х1исавну буссар.
Лакрангу, щалагу Да­гъусттаннангу пахруну хъанахъисса жула цIанихсса, Аьрасатнаву машгьурсса хирург-стоматолог барча уллай, чIа тIий буру цIакьсса цIуллушивугу, ц1у-ц1усса хьхьи­чIуннайшивурттугу!
ТтурчIиял жямат