ЧIирисса чIумул дянив дурсса хъуннасса даву

«Дагестанская правда» кказитрал редакциялий хьунни Украиннал аьрщарай жанну дуллусса аьралитурал кулпатир­ттан кумаг буллалисса «Все Вместе» т1исса фондрал каялувчи Салимхан Мирзехановлул ва Дагъусттаннал захIматрал ва социал иширттал министрнал хъиривчу МахIаммадзагьид Кихасуровлул пресс-конференция.

ДакIнийн бутан, 2022-ку шинал апрель зуруй Дагъусттаннал БакIчи Сергей Меликовлул баян бувссия Дагъусттаннал ЗахIматрал ва социал иширттал министерствалучIа Украиннайсса хасъсса операциялуву ливтIусса аьралитурал кулпатирттан кумаг буллансса фонд тIивтIушиву. ХIукуматрал бивчуна фондрайн 50 миллион арцул. Фондрал счетрайн арцу дичин бюхълай бия ччиманаща.

— Чумартсса, ка тIиртIусса Дагъусттаннал халкьуннава чансса къабувккунни фондрал счетрайн арцу дичинсса, пенсионертурайн бияннин. Миннан цала цIарду кIицI лаглай ччай бакъар. Фондрал дуллалимунил чIарав бавцIунни аьлимтал, культуралул, кIулшивуртту дулаврил ххуллий зузими. ХIакьинусса кьини фондрал счетрай бур 35 миллион арцул. ЧIирисса чIумул дянив жуща хъуннасса даву дан бювхъунни. Цинявппагу аьпалухьхьун лавгсса аьралитурал кулпатирттан кумагру бувссар. КIицI лаган, вайннан так арцуйнусса кумаг бакъар аьркин багьлай. ЧIявусса цаймигу ишру бур ичIаллил масъаларттайн бияннин жу чIарав бацIан багьлагьисса, – увкунни Салимхан Мирзехановлул.

Социал иширттал управлениялийн ва КЦСОН-далийн тапшур бувну бур фондрайн булуншиврул вай кулпатирттал документру хIадур бан.
ЧIявуми аьралитурал кулпатру къатта-къушлил масъаларттащал хьунабавкьунни. Украиннай ливтIусса контрактниктал Аьра­сатнал личIи-личIисса регионнай цивппа къуллугъ буллалисса кIанттурдай яхьун буллусса квартирардай бивкIун бур. Утти вайннал кулпатирттан, цаламинначIан гъанну бикIан, Дагъусттаннайн зана хьун багьну бур.
Чансса бакъар ЖКХ-лул буржру лахъан кумаг бувара тIи­ссагу.

– Цинявппагу жуйнма бувксса кулпатирттал масъалартту, ххал бивгьуну, щаллу буллалиссару жу, – бувсунни «Все вместе» фондрал каялувчинал. Ванал мукунма бувсунни вай кулпатирттащал психологталгу зий бушиву. Аьрасатнал Президентнал хIукмулийну, Ххувшаврил байрандалуцIун бавхIуну, гьарца кулпатран кьу-кьу азарда къуруш дуллушиву, мукунма булун ккаккан бувсса миллион арцулгу ялун.

Вайннал бусласимунийн бувну, хIакьинусса кьини циняв аьралитурал кулпатирттан ккаккан бувсса кумагру бувну бур.
КIицI лаган, щалагу Аьрасатнаву так Дагъусттаннай бур хIакьинусса кьини укунсса фонд.