Июнь зурул 20-нний АхIмад-Хан-Султаннул цIанийсса МахIачкъалаллал аэропортрай, аьдатрайн бувну, шадлугърал даражалий кIицI ларгунни Nordwind авиакомпаниялул Дагъусттаннайн Уфалия цалчин дуллалисса рейс.
Шикку гьуртту хьунни МахIачкъалаллал аэропортрал директор Саэд Рамазанов, Nordwind авиакомпаниялул коммерческий директор Антон Маттис, ДР-лул халкьуннал художествалул промыслирдал ва туризмалул министрнал хъиривчу Анна Безрукова, Ухссавнил Ккавкказуллал федерал округрайсса Pegas Touristik тIисса офисрал каялувчи Илона Чиханацкая ва «Лазурный берег» ООО-лул туроператорнал хъиривчу МахIаммадаьли Аьлибеков.
МахIачкъалаллал аэропортрая Башкортосттаннал хъуншагьрулийн итни ва хамискьинирдай лехлант1иссар Boeing 737 800 самолетру.
Nordwind авиакомпаниялул гъинттулсса рейсирдал расписаниярттайн бувну, Уфа Аьрасатнаву ххюлчинсса шагьру хъанай бур МахIачкъалалийн пассажиртурансса къулайшиннарду дусса рейсру тIиртIусса. ХIакьинусса кьини ва авиакомпаниялул МахIачкъалалийнсса рейсру дуллай бур Москавлия, Санкт-Петербурглия, Нижний Новгородрая ва Къазанная. Москавлия дуллай бур кьинилун кIира рейс, Санкт-Петербурграя — кьинилун ца рейс, Нижний Новгородрая ва Къазанная — нюжмардий кIира рейс.
Шиккува кIицI лаган, Nordwind авиакомпания духлай дур Аьрасатнавусса хъунисса авиакомпаниярттал сияхIравун. Компаниялул базовый аэропортру бур Шереметьеволий, Пулковалий, Сочилий ва Калининградрай.
2021-ку шинал авиакомпаниялул лайкь дурссар Skyway Service Award чулухасса «Лучший перевозчик России по курортным направлениям» тIисса премия, 2022-ку шинал ххув хьуссар «Лучшая авиакомпания в категории международные туристические чартерные перевозки» тIисса номинациялуву.
SCAN медиарейтинграл версиялийн бувну, «Охват аудитории 2021» тIисса Аьрасатнал авиалиниярттал категориялуву Nordwind авиакомпаниялул кIилчинсса кIану бугьлай бур.
