Виричунал цIа чирчусса ула цIакь дунни

Ларгсса тталаткьини НурмахIаммад ХIажимахIаммадовлул цIанийсса МахIачкъалаллал №42 школалий Виричунал цIа чирчусса мемориал ула цIакь дунни. Ва даврил сиптачитал бур Аьрасатнал аьрали тарихрал ккурангу, «Единая Россия» партиялул «Историческая память» тIисса проектраха зузимигу, Да­гъусттаннал национал политикалул ва диндалул иширттал министерствагу.

Аьрасатнал аьрали тарихрал обществалул вакилтурал бусаврийн бувну, 2014-ку шиная байбивхьуну, уттинин Аьрасатнаву вайннал хIарачатрайну мукьазаруннийн дияннинсса мемориал уларду цIакь дурну дур. НурмахIаммад ХIажимахIаммадов дуклай ивкI­сса школалийн ва кьини бавтI­цириннавух бия Дагъусттаннал национал политикалул ва диндалул иширттал министр, Аьрасатнал аьрали тарихрал обществалул Дагъусттанналмур отделениялул каялувчи Энрик Муслимов, МахIачкъала шагьрулул кIулшивуртту дулаврил управлениялул хъунама Марат Ибрагьимов, Аьрасатнал Виричу Загьид Загьидов, НурмахIаммадлул нину Сапижат, «Аьрасатнал хIаписартал» Астраханнал региондалулмур отделениялул председатель Анатолий Салин, Да­гъусттаннал Хъаннил союзрал хъунмур Интизар Мамутаева, 1999-ку шинал Чувшиврул ордендалун лайкь хьусса Полина Халилова ва цаймигу.
Энрик Муслимовлул, Дагъусттаннал БакIчи Сергей Меликовлул цIанияту бавтIцириннахьхьун ссаламгу буллуну, кIицI лавгунни НурмахIаммад ХIажимахIам­мадов Щалагу Аьрасатнал ва дагъусттанлувтурал пахрулул ва ххувшаврил лишанну хъанай ушиву.
Астраханнаясса хъамаличу Анатолий Салиннул школалул директорнан Барчаллагьрал чагъар буллунни.
2002-ку шинал Чачаннаву жан харж дурсса саллатIнал ниттил Нурслу Азербаевал бувсунни цуппа Астраханная бувкIшиву Виричу НурмахIаммад тарбия увсса ниттихь барчаллагь учин. Махъру лавхъуна ялагу НурмахIаммадлул ниттил Сапижат Мазаевал, Загьид Загьидовлул, Интизар Мамутаевал, школалул директор Ххадижат ХIусмановал, авгъаннал иширттал гьурттучи МахIаммад Хадулаевлул ва цаймигу бусрав­­сса инсантурал.
Дуклаки оьрчIал ккаккан був­на аьрали сценкартту, дур­ккуна назмурду. Ва школа­лий буссар НурмахIаммад ХIажи­махIаммадовлул цIанийсса музейгу.