Дагъусттаннал БакIчи Сергей Меликов ларгсса хамискьини хьунаавкьунни Аьрасатнавусса Ираннал Ислам Республикалул вакил Казем Жалалищал. Меликовлул кIицI лавгунни Дагъусттаннал ва Ираннал дянив ччянира хIала-гьурттушиврийсса арарду цIакь хьуну душиву, хаснура дахху-ласулуву. Бувсунни хъин чулий ккаккантIишиву Ираннал инвестортурал Дагъусттаннал шяраваллил хозяйствалуцIун ва промышленностьрацIун дархIусса проектирттавухсса гьурттушинна.
Казем Жалалилгу кIицI лавгунни Аьрасатнал ва Ираннал машлул, экономикалул арарду хьхьичIуннай давриву Дагъусттаннал бияла хъунмасса бушиву. «Жугу хIадурну буссару аьмсса проектру ххал дигьлан, жущава шаймур буллантIиссару ми проектру бартдигьлан», – увкунни посолнал, гьашину январь зуруй Аьрасатнал ва Ираннал президентътал хьунабакьаврилгу кIива билаят хъиннува гъан бувшиврий чIурчIав дурну. Хьунабакьаврий гьаз бунни Дагъусттаннал логистикалул потенциал кIирагу республикалун мюнпатранну ишла баврил масъалартту.
