Дагъусттаннал БакIчи Сергей Меликовлул Петербурглив хьусса экономикалул форумрайсса республикалул делегациялул даврил хIасиллу дунни. Журналистътуращалсса хьунабакьаврий ванал кIицI лавгунни форумрайсса даву сантирайсса ва лябуккулийсса хьушиву.
– Жу жува уттинингу хIала-гьурттуну бивкIсса Новгородраясса, Тулалиясса, Ухссавнил АьсатIиннавасса ва Ростовраясса коллегахъащал кIивайннанмагу мюнпатсса давуртту ххал дигьарду. Дагъусттан хIакьину хIала-гьурттуну буссар цайми регионнащал туризмалул иширттавугу, цайми иширттавугу. Жу билаятрал экономика ва социал тагьар хьхьичIуннай дуваву мурадрай зузисса «Газпром» ПАО-лущал, Аьрасатнал экологиялул операторнащал, ВТБ-лущал, Сбербанкращал кьутIирду цIакь дуварду. Жу шинал мутталий хIадур хъанай буссияв форумрайн. Дагъусттаннан газрал отраслилуву низам дишин аьркинну бия, газ къабувцуми кIанттурдайн буцин багьлай бия. ГазрацIун дархIусса захIматшивурттава буккан аьркинссару жу утти «Газпром межрегионгазращал». Дагъусттаннай газрал ччуччиялул (газомоторное топливо) комплексру гьаз буллансса кьутIи цIакь дурссар. Цинявннан ххуйну кIулсса шагьраххуллу «Ростов-Баку» Азирбижаннавасса ва Ираннавасса кьай ххилаххалтрангу аьркинсса ххуллур, транспортрал, ххуллурдал тагьар къулай дуллантIиссару, – увкунни Меликовлул.
Бувсунни ванал хъунисса банкирдащалсса кьутIирдаягу, ВТБ банкрал республикалий промышленностьраха, производствалуха, туризмалуха зузисса инвестортуран финансирдал кумаг буллантIишиву ва мукунма ВТБ-луя хъуни дакъасса предприятияртту зузи дурсса ишбажаранчитурангу кумаг бикIантIишиву. Бувсунни Сбербанкращалмур кьутIи цифровизациялул даву гьаз дуваву мурадрайсса душиву. Экономикалул дунияллийми давурттавух Меликовлул кIицI лавгунни Къалмукьнащал уртакьну агпромышленность гьаз давриха зунтIишиву, икьрал дуршиву ятту гьарза бавриха уртакьну зун.
– Дагъусттаннал экономика ва хIакьинусса оьрму ккаккан буллалисса стендгу машгьурну дия форумрай. Республикалул продукциягу ккаккиялун дирхьуну дуссия, миннухгу къулагъас дуллай бия, – увкунни Меликовлул.
Дагъусттаннал хъунаманал агьамми иширттавух кIицI лавгунни, хъиривсса шинал Расул ХIамзатовлул 100 шинал юбилей дуван хIадур хъанай бухьувкун, ми мероприятиярттайгу культуралул, спортрал дусшиврийсса арарду цIакь дувансса давуртту дувантIишиву.
