Июньдалул 21-нний Дагъусттаннал БакIчи Сергей Меликовлул каялувшиврий хьунни Щалвагу Аьрасатнал «Оьруснал географиялул общество» тIисса жяматийсса сакиншиндарал Дагъусттаннал отделениялул Попечительтурал советрал батIаву.
Республикалул БакIчинал бувсунни батIаврил мурад бушиву му сакиншиндарал Региондалул Попечительтурал советрал 2022-ку шинал давурттал план бартдигьаврил хIал (статус) ккаккан баву.
План цукун бартдигьлай буссарив бувсунни РГО-лул Региондалул отделениялул Попечительтурал советрал председательнал хъиривчу Муслим Гьиндиевлул. Мунал тIимунийну, хIадур дурну дур 10-нниха лирчусса программарттал давуртту: географиялул, дуккаврил, элму ахттар давурттал ва цаймигу. Миннувату Муслим Гьиндиевлул личIину бувсунни «Дагъусттаннал лагмасса тIабиаьтрал ва культуралул, ва тарихийсса никирал» Географиялул атласраха зий дурсса давурттал хIасиллу ххал дигьлагьисса ккуркки столданул хIакъираву. Ихтилатчинал тIимунийну, мукунсса даву дурну дур совет заманная махъсса чIумуву цалчин.
ДР-лул туризмалул ва халкьуннал касмурдал министрнал кIанайма Аьбдуллагь МахIаммадовлул бувсунни гьашину сентябрьданий «ТIивтIусса Дагъусттан 2022» тIисса туристътурал форум баврил хIакъираву.
«На дакI дарцIуну ура, Оьруснал географиялул обществалул ва Попечительтурал советрал чялишсса давурттайну жущава бюхъантIишиврий ккаккан дуван Дагъусттаннал ляличIишиву ва цIусса даражалий ккаккан дуван жулла республика Аьрасатнал ва дунияллул географиялул карталий», – кунни Меликовлул.
