Махъзуманив Аьрасатнал хIукуматрал оьрчIансса пособияртту, зукъазиминнансса пенсияртту гьаз бунни. Дуки-хIачIиялул багьри биялну гьаз хьуну бухьувкун, хIукуматрал хIарачат бур, компенсациярттал индексация дурну, кумаграл ка тIитIин.
Ттун хIукуматрал къулагъас дурну ччива ичIува захIматну къашавайсса инсантураха, къари-къужраха ва мушакъатминнаха аякьа дуллалиминнах.
Миннан паччахIлугърая зуруй 1200 къуруш дур компенсациялун ва закондалийн бувну миннан цамур доход дикIан къабучIину бур. Хъунив хьусса, шанийн багьсса инсантуралсса, 1-мур группалул инвалидтуралсса буллан гьар кьини бигьа бакъар, хаснува цивппалу кьабитан къабучIисса иш бухьурча. Хьхьу-кьини аякьа аьркинссагу инвалидтураву чансса бакъар. Вана ттул чIаххуврайсса хъамитайпалун, инсульт хьусса ниттилсса булланшиврул, даву кьаритан багьунни.
Ниттил пенсиягу, 1200 къурушгу ссан диял хьунссар? 1200 къуруш чанни. Ва ялагу. Коронавирусрал пандемиялул ппурттуву чIявуссаннан дистанцион журалий зун багьуна. БучIия хIукуматрал, ва кIанугу хIисавравун лавсун, ичIува инвалидтал буминнан дистанцион журалийсса даву дучIи дуварча. ТIайлану хьунссия.
Гулиана МахIаммадова,
ДГУ, РДО, 4-мур курс
