Рейхстаграй ттугъ бишлашисса сурат

Хъунмасса Буттал КIанттул цIанийсса дяъви байбивхьу­сса июнь зурул 21-22 гьантрай Аьра­сатнаву кIицI лагайссар Аьпалул ва хIасратрал кьини. Ва кьини, «Дяъвилул цIарал суратру » тIисса Дунияллул халкьуннал дянивсса акциялул лагрулий, МахIачкъалаллал майданнив 10 азарва чирахъ лавхъун, Рейхстаграй Ххувшаврил ттуъ бишлашисса сурат сакин хьун дунни. Ва даврил сакиншинначиталну хьунни Дагъус­ттаннал Жагьилтурал министерство ва жагьилтурал жяматий­сса организациярду. Министерстволул консультант Рамазан МахIаммадовлул кIицI лавгсса куццуй, акциялул цал ххишалану дакIнийн бутан аьркинссар хIакьинусса жагьилтуран, ялун нанисса никиран, цукун ххирану дарцIуссарив жула халкьуннан та дяъвилийсса Ххувшаву.
Мероприятиялий гьуртту хьунни личIи-личIисса министерствардал ва ведомствардал вакилтал, волонтертал, чIа­ваармейцы.