167 къатлувун бувцунни газ

Газ буцаврил хIакъираву бувсунни «Газпром газораспределение Дагестан» идаралул директор Олег Чиглинцевлул, мунащал архIал журналистътуращалсса брифинграйн увкIунни ДР-лул ПаччахIлугърал регистрациялул, кадастрданул ва картографиялул федерал къуллугърал управлениялул каялувчи Арсен ПирмахIаммадов.

Вайннал дунни Дагъусттаннай догазификациялул программа бартдигьаврил цIубутIуйсса хIасиллу, бувсунни программа цукун бартдигьлай буссарив, газ къатрачIан буцайни цукунсса хIаллихшинну дуссарив, къатрал заллухъруннал документру цукун дузал бувну буссарив ва ми цукун щаллу буван аьркинссарив.

Компаниялул каялувчинал тIимунийну, Республикалий догазификациялул программалувух гьуртту хьуншиврул дуркIун дур 2600-нниха лирчусса заявкарду, миннувату кьамул дурну дур 2313. ХIакьинусса кьини чирчуну дур 1586 объектрансса кьутIи. Газ итабавкьуну бур 167 къатлувун.

Компаниялул каялувчинал мукунма бувсунни хIаятравух газ буцайни дурсса давурттахлу ва газрал аьркинлугъ ласун буллусса багьа лахъаврил хIакъиравугу. Цаппара журалул (категориялул) инсантуран мукунсса кумаг буван дагьан дурну дур 90 азарда къурушрачIан дирссаксса арцу. Чиглинцевлул бувсмунийну, ва программалувух гьуртту хьун ччиминнаща бюхълай бур документру булун МФЦ-лийн, ягу компаниялул идаралийн.

Программалул лагрулий газ уква буцинтIий бур участокрал (хIаятрал) дазучIан, яла къатлувун залуннал багьлух буцинтIиссар.
Арсен ПирмахIаммадовлул бусаврийну, Дагъусттаннай догазификациялул давуртту хIурхIа дачаврил савав хъанай дур инсантурачIа къатрал заллушиврул (правоустанавливающие) документру бакъашиву. Мунал дагъусттанлувтурахь тавакъю бунни цалва къатрал документру низамрайн буцин.