Июньдалул 15-нний ДР-лул БакIчинал ва ХIукуматрал Администрациялул каялувчи Алексей ХIасановлул председательшиврий хьунни ДР-лул Региондалул управлениялул центрданул (ЦУР) гьашину майрал 11-нния июньдалул 13-ннийнин аьч бувсса захIматсса масъалартту ххал бигьлагьисса батIаву.
Микку махъ лахълай, Алексей ХIасановлул бувсунни ва батIаврий къуртал хъанахъишиву республикалул ЦУР-данул муданнасса низамрай ашкара буллалисса масъалартту ххал бигьлагьисса шинал давуртту. Мунал тIимунийну, ва чIумуву сакиншиндарал ккаккан дурну дур цурда хъанахъишиву управлениялул масъалартту дузал буван бюхъайсса ца агьамсса идарану. Му идаралул агьаммур мурадну хъанай бушиву агьалинал захIматсса масъаларттал мониторинг ва анализ даву, дагъусттанлувтурал лабизавурттах ва аьрзардах къулагъас дуллалаву. Алексей ХIасановлул ляличIисса къулагъас дунни туристътурал сезондалух. Мунал бувсунни властьрал органнал вакилтуран аьркиншиву чялишну зун информациялул майданнив, хаснува – социал сетирдаву.
ЦУР-данул каялувчи МахIаммадсултан Аьбдуралимовлул махъ лавхъунни исполнител властьрал ва кIанттул цилакаялувшиврул органнал дурсса давурттал хIакъираву. Мунал тIимунийну, дузал буллай бур Дарбантуллал райондалийсса лекьансса тагьарданийсса школа, дузал буллай бур Избербашуллал аэропортрал райондалийсса щинал турба цIу буккан баврил масъала. Майрал 11-нния июньдалул 13-ннийннин ЦУР-данул ххал диргьуну дур 2460 инсаннал чирчусса лабизавуртту. Вай чIяруми лабизавуртту диркIун дур дяркъусса щин дакъашиврул, ххуллурду бакьин буван аьркиншиврул, тIювардай чани бакъашиврул хIакъиравусса.
ЦУР-данул каялувчинал бувсунни диялдакъашивуртту дусса цаймигу кIанттурдая, хаснува цIуллушиву дуруччаврил аралувусса иширттая.
БатIаврий махъру лавхъунни мукунма ДР-лул ГЖИ-лул каялувчи Сергей Касьяновлул, ДР-лул цIуллушиву дуруччаврил министр Татьяна Беляевал ва цайминналгу.
