Июнь зурул 15-нний Гъумук Культуралул къатраву хьунни республикалул хъаннил мажлис. Ванил сиптачитал бия Дагъусттаннал Муфтиятрал просвещениялул хъаннил отдел.
Аьдатрай мажлис байбивхьуна Кьурандалул аятирттая. Исламрал диндалул ххуллу цIакьну буруччин аьркиншиврия ва му давриву хъаннилмур биялагу агьамсса бушиврия ихтилат бувна Гъумучиял имам Ансар Сулаймановлул. Муфтиятрал просвещениялул хъаннил отделданул хъунмур Загьра Исмяиловал бувсуна жяматрал оьрмулул иширттавухгу хъами чялишну гьуртту хъанай бушиврия, кулпатирттаву инсаншиврул кьимат хьхьичIунну бикIан аьркиншиврия, исламрал кIулшивуртту куртIгу, цIакьгу дулларча, оьрчIру бяйкьусса ххуллийн къабуккантIишиврия.
КIицI лавгсса отделданул зузала Ххадижа Аьбдуллаевал бувсуна исламрал дингу дуручлай, адаврай къуццу тIутIисса инсан махъминнангу эбратну хъанахъишиву. Вара мяъна-мурадрайсса ихтилат бувна хъаннил отделданул Лакралмур райондалийсса хъунмур ПатIимат Оьмаровал. Мажлисрал программа авадансса дия: увкуна нашидру, дурккуна назмурду, дурна викторинарду, ахирданий дурккуна дуаьрдугу. Ххуйсса гьурттушинна дуруна мюрщисса душвавралгу.
Хъамалудушру бивуна Гъумучиял цIанихсса мизитравунгу, цайми зияратирттайнгу.
– Жул ният дур лакрал шаннагу райондалийсса душвавращал дахIаву цIакь дуван, уртакьну зун, ва ххуллухсса мажлисгу жува рязину личIансса даражалий лавгунни. Лакрал хъами мудангу гьармуниву хьхьичIунсса, итххявхсса бур, диндалул иширттавугу хьхьичIунну бивкIссар, жунма хIала-гьурттуну къуццу тIун аьркинссар жулла ялун нанисса никирал бучIантIимунил цIаний, ми къаххуймуния буруччиншиврул, исламрал тIайласса ххуллийн бурган буваншиврул, – увкунни Ххадижа Аьбдуллаевал «Илчилул» корреспондентнахь. Вай душваврал буллалисса хIарачат миллатран барачатну хьуннав, вайннул давурттаягу, жуятувагу Аллагь рязину личIаннав!
