Самаралийсса жулва къавтIалт

Самаралийсса жулва къавтIалт

Самара шагьрулийсса «DagDance SchooI» цIанилусса «Лезгинкалул» школалул уттигъанну ккаккан дунни отчетрал концерт. Ва шадлугъ цукун хьуссарив жухь бувсунни Самаралий ялапар хъанахъисса, ва школалийн заназисса жулва лакку оьрчIал.

Шадлугъ хьуссар Самара шагьрулул муххал ххуллул зузалтрал Культуралул дворецраву, шагьрулул администрациялул чIарав бацIаврийну ва Аьрасатнал Халкьуннал культуралул ирсирал шинал лагрулий.

Ва хъанай дур ва школалул цалчинсса отчетный концерт. Жулва чIава къавтIалтрал «Очаг мой – Дагестан» тIисса цIанилу ккаккан дуллалисса концертрайн бувкIун бия Самарская областьрал губернатор Дмитрий Азаровлул нину Инна Азаровагу.

Губернаторнал нину да­къассагу, бусравсса хъамаллуравух ялагу бия шагьрулул администрациялул вакил Дмитрий Долганов, Самара шагьрулул Ленинский райондалул бакIчи Елена Бондаренко, Самараллал Губернская Думалул депутатътал Роман Балтер ва Светлана Ильина, ПаччахIлугърал Думалул депутат генерал Шамановлул кумагчи МахIаммадрасул АхIмадуллаев ва цаймигу. Вай цинявппагу рязину ливчIунни ва кьинисса шадлугърая.

Самарская областьрал «Культурный центр Дагестан» тIисса жяматийсса организациялул Советрал председатель (шиккува кIицI лаган, ва СоветрачIари ва школагу тIивтIусса) Насрулла ХIамзаевлул цалва ихтилат­раву чIурчIав дунни ва школалул художествалул каялувчи Сяид МахIаммадовлул буллалисса хъунмасса захIматрай ва хIарачатрай.

– Сяид МахIаммадов ур Да­гъусттаннал къавтIаврил Па­ччахIлугърал академичес­кий «Лезгинка» ансамбльданул агьаммур составраву ивкIсса гьунар бусса къавтIала ва жулва школалул хIакьинусса ххаллилсса каялувчи. Жуна цинявннан чIалай ур ва цукун усттарну зий уссарив оьрчIащал, цуксса хъуннасса даву дуллай уссарив. Ванал пишакаршиврул барашиннану хъанахъиссар школалул къавтIалтравух, Дагъус­ттаннаясса бакъа, оьруснал, татарнал, армяннал, къазахнал ва цаймигу миллатирттал вакилтал бушивугу, – увкуна Насрулла ХIамзаевлул.
Шадлугъ сакин хьуну дия кIива бутIуя.

Концертрал цалчинмур бутIуву сахIналийн оьрчIру бувккуна репетициярдай цивппа бикIайсса яннардаву – залданувун бавтIминнан ккавккуна цIусса къавтIаву лахьлай, тамашачитуран му кка­ккан дуван сахIналийн букканнин оьрчIал ва хореографтурал цуксса хъуннасса чIун харж дувайссарив ва цуксса хъунмасса захIмат бувайссарив, гьарцагу элемент лахьлай, ласайсса шаттирал ялув бавцIуну, ца къавтIаврил номер щаллу хьунни циксса элементру лахьхьин багьайссарив.

КIилчинмур бутIуву оьрчIал ва душварал, миллатирттал яннардугу ларххун, ккаккан дурна «Горцы», «Озорные девчата», «Гергебиллал» цIанилусса ва цаймигу къавтIавуртту.
Дагъусттаннал миллатирттал оьрчIру бакъасса, тамашачитурал хьхьичIун мукунма бувккуна вава школалийсса белору­ссиянал, татарнал, къазахнал, армяннал, башкирнал, кореянал къавтIаврил ва балайлул коллективругу.

Ва кьини сахIналийсса личIи-личIисса миллатир­ттал оьрчIавух бия жулва лакку оьрчIругу: КIундиннал шяравасса Аьлибуттаевхъул Камилла, Диана ва Башир, Маммаевхъул Арсен ва Замир, Хъунбуттаевхъул Амиран ва Дарина ва м.ц.
Ссурвал Камилла ва Диана дуклай бур чил билаятирттал мазру куртIну лахьхьайсса Самара шагьрулийсса №133 гимназиялий.

– На дуклай бура 3-мур кла­ссраву, Диана тIурча – 2-мур классраву. Гимназиялийсса агьаммур дуккаврищал жу нюжмардий шанна кьини ва шаннагу кьини кIи-кIира ссят хъунма­сса гъирарай гьан дувару жулва къавтIаврил школалий. Ттун цинярдагу къавтIавуртту ххуй дизай, ляличIинурив – лакралсса ва яруссанналсса. Жун хъинну ххирар жулва коллектив ва жула хореограф.
КъавтIавурттайн бакъасса, на ялагу лагара бисероплетениялул кружокрайн, янна дуруххан лахьхьаймур кружокрайнгу, рисованиялийнгу, – буслай бур чIава къавтIала Камилла.

Читайте также: