ЧIяйннал шяравусса шанма хъатIи

Июньдалул 11-чинмур кьини ЧIяйннал шяраву кIура дарну дия ХъатIал кьинилийн. ДакI ххари хъанай, пахру багьлай бия щалла шяраваллил жямат ва фестивальданий гьуртту хъанахъаврияту. Арамтал, хъами, оьрчIру бия хъинну авурсса жула миллатрал яннардаву.

Ца кьини бувуна шанма хъатIи. ХъатIал мажлис тIив­тIуну бия ЧIяйннал шяраваллил Культуралул къатрал хьхьичI. Ва кьинисса шанма хъатIи бавугу най дия фестиваль зумуну. ХъатIал аьдатру ккаккан дуллалисса фестивальданун «Традиционная культура малочисленных народов Северного Кавказа, России» тIисса цIа дия. Шикку хъанахъисса ишру ласлай бия Дагъусттаннал телевидениялул оператортал.

ХъатIал мажлис тIивтIуна ЧIяйннал школалул директор Альбина ХIаммакуевал, бачин бувна МахIаммад Апанниев. Тямаданал барча бувна наврузбагтал ва жалиндушру. Мажлисрай махъру лавхъуна Ккуллал райондалул бакIчинал хъиривчу Анатолий Давдиевлул ва ЧIяйннал администрациялул бакIчи МахIаммад Билаловлул.
Фестивальданий гьуртту хьун бувкIун бия Ингуш Республикалул чулухасса душру. Вайнналми лаххияртталгу мажлисрал сий хъиннура авур дуллай дия.
Тямаданал цалчинмур жалин дуцин жямат гьан бувна, жула аьдатрайн бувну, бахьтта. КIилчинмур жалин дуцин гьан бувна чай бурттий диртун. Шамилчинмур жалин тIурча, ттисса чIумул зумуну, машиналий дурцуну бувкIуна.



[dropcap]Я[/dropcap]ла шамагу наврузбаггу, шаннагу жалингу цачIуну бувуна ссувхIат.
Мажлисрал ахирданий Ингушнава бувкIсса хъамаллурал бахшиш бувуна цала республикалия бусласисса альбом ва цала мазрайсса цаппара луттирду. Вайннан дуллуна Ккуллал райондалул чулухасса грамотартту.

ХIасил, фестивальданул зумунусса хъатIив баву авурну хьуна. Ахирданий Культуралул къатраву тIивтIусса ссупралухун циняв бавтIуна. Хъинну нахIусса ва чIярусса дукрарду дия.
ХъатIал бакъа жула шяраваллава чIу къабаяваннав, хъатIив бувмигу талихIрайн букканнав.