Ларгсса арвахIкьини МахIачкъалалив, «Марва» тIисса гостиницалий хьунни «Дагестан» РГВК-лул цIусса проектрал презентация.
«Дурссар Дагъусттаннай» тIисса ва передачалул автор (передача дачин дурнугу ва цуппа бия) ПатIимат Расуловал бувсмунийн бувну, передача республикалул бизнесрая, Дагъусттаннал производительтурая ва миннал дуллалимуния дур.
Дагъусттаннай чансса бакъар, бюхъулий, лябукку буну бизнесгу дачин дурну, ххуйсса продукция итадакьлакьисса ишбажаранчитал. Телеканалданул бригадалул буслан тIий бур вайнная ва вайннал итадакьаймуния, муштариначIа кьиматрайсса хъуслия.
Программалул цалчинми передачарттал бувсъссар Къизлярдайсса дикIул комбинатрал даврия (ккурккимайнттал производствалия) ва пяп-чарил давурттан, стройкалун ишла дуллалисса материал итадакьлакьисса Дарбантуллал заводрая. Гьарца арвахIкьини, кьунниялай ссят урчIуннил дачIи хьусса чIумал, ххал дулувара «Дагестан» РГВК-лул «Дурссар Дагъусттаннай» тIисса передача.
Ххуйрихха Дагъусттаннай дурмуния, республикалий экономика сантирай хьхьичIуннай най душиврия бусласаву.
