Инсантурал хасият мукунсса дурхха, паччахIлугърал чулухуннайсса рязибакъашиву дархIуну дикIай ттучаннай дахлахисса хъуслил багьрацIун.
Украиннал аьрщарай хасъсса аьралий операция сукку шайхту, цаппара хIукуматирттал жущалласса дахху-ласу дацIан дурунни. Бунияла, вай жучIатува лихълахъисса, Хъун дяъвилул чIумал фашистътурал инсантурай буллай бивкIсса зулмурду къакIулну бусса бурхха тIисса пикригума хIасул хъанай бур.
Аьралий операция байбивхьуния махъ жула аьралуннал канийн букIлакIисса Украиннал националистътурал чурхру бия тату суратирттал бувцIуну, фашизмалул лишаннугу хIаласса. Ва операция байбивхьуну цалчинсса зуруй гьаз хьуна ттучаннайсса хъуслил багьригу. Амма утти, пиво рутIлатIийни бокалданул кьабакIраву хIасул шайсса хьама яларай дагьайсса кунна, хъуслил багьригу ялавай багьлан бивкIунни.
Ялавай багьунни ххяххиярттал нагьлил багьри. Цакьнира ца литIра дикIайссия 170 къурушран. Май зурул гьантрай миннул багьри зунттавусса ттучаннай хьунни 150 къурушран. Инсантурал дукра дуван, машинарттавун бутIин ласайсса газрал багьригу Ваччав буссия 28 къурушран, утти хьунни 19 къурушран. Умуд бур укун, чан-кьанну тIий, жула экономикалул ишру цила кIанайн багьанхьуви тIисса.
