ОьрчIал кьини оьрчIал багъирдаву

[dropcap]О[/dropcap]ьрчIру буруччаврил кьини лахъа-хъунну хьунадаркьунни Ккуллал райондалийсса оьрчIал багъирдаву. Райондалий бур 6 оьрчIал багъ: Хъусрахь, Ккулув, Ваччав, Вихьлив – цайва цивппалусса, ЧIяв, Хъювхъав – школарттащал хIаласса.


Ттунгу ОьрчIру буруччаврил кьини бахтти хьуна ябитан Ваччиял шяраваллил багъравусса тяхъашиврух. Вайннал багърал хIаят дия чIюлу дурну, амма, кьини дяркъусса душиврийн бувну, шадлугъмур дуруна къатраву.

Тяхъашиву дайдишиннин хъхьичI на чIиви-хъунсса ихтилат бувссия Ваччиял шяраваллил оьрчIал багърал каялувчи Чупалаева Асватлущал.
Ванил бувсуна институт бувккуну махъ цуппа зий хьушиву 25 шин. ОьрчIал багъраву бур 35 оьрчI. Шиву тарбия хъанай бур 2 шинава 4 шинавун бияннин­сса ва 4 шинава 7 шинавун бияннинсса оьрчIал 2 группа. Тарбиячиталну бур 45 шинай ва даврий зузисса Апанниева Магьият ва 10 шинай зузисса Чупанова Гунназ.

Тарбиячитурал кумагчиталну бур МахIаммадова Мариян ва Рамазанова Разият. ОьрчIал байрандалий номерду ккаккан буван бувкIуна чIюлусса яннардаву исвагьину чIалачIисса оьрчIру ва цаппара оьрчIал нитти-буттахъул.

ОьрчIру ва нину-ппу барча буллалисса махъ лавхъуна Асватлул. ОьрчIал кьини барча дан бувкIун бия Ккуллал райондалул администрациялул зузала Нахаева Фиалка, ниттихъал цIания оьрчIру барча бувна Бугъаева Надеждал, Шалласуева Аьйшатлул ва цайминнал. ОьрчIал увкуна балайрду, дурккуна декламацияртту, бивзуна къавтIун. Тя­хъашиврул ахирданий хъамаллурал дарчIуна оьрчIайх нацIу-кьацIу.

Буруччиннав зу, оьрчIрув, нитти-буттахъащал, Аллагьнал!