Москавлив, ОьрчIру буруччаврил байрандалул хьхьичI кьини ВДНХ-лийсса «Колизей Холл» тIисса залдануву хьунни «Русская культура» АНО-лул хIадур дурсса оьрчIансса хъуннасса байран.
Ванил сиптачитурал бувсмунийн бувну, ва дур чIяву миллатру яхъанахъисса билаятрай итххявхсса оьрчIал гьунардугу, творчествагу чивун дуккан дуван кабакьу буллалисса даву. Вава мурад бур творчествалул оьрчIан ка-кумаг буллалисса «Kids Love» премиялул сиптачитуралгу. Хъуннасса концертрал режиссершиву дурну дур «Союз Национальностей» журналданул хъунама редакторнал хъиривчу ПатIимат ХIаммадовал. Москавливсса Дагъусттаннал Культуралул центрданул чулуха гьуртту хьуну бур ПатIимат ХIайбуллаева каялувшиву дуллалисса «Рассвет» тIисса халкьуннал къавтIаврил ансамбльданул оьрчIру.
«Жулва магьирсса къавтIалтран грамотартту, сертификатру, статуэткартту ва дипломру буллунни «Русская культура» АНО-лул каялувчи Юлия Сартаковал. Хъинну чIявусса тамашачитал бавтIсса залдануву жулва Дагъусттаннал чIава къавтIалтрал гьунардануя агьали хIайранну личIаву жунгу тIааьнну бия. Мегаполисрайгу Дагъусттаннал къавтIаврил культура ядурну, оьрчIангу лахьхьин дуллай бушиву – вагу ххуйшивур, ххаришивур», – увкунни Москавуллал Дагъусттаннал Культуралул центрданул вице-президент БатIи Оьмаровал.
