Наркотикирттайн къаршисса щалагу Аьрасатнал месячникрал лагрулий Лакрал театрданул ккаккан бунни «Жестокая правда» тIисса композиция.
Цил гьануну лавсун бур наркотикру сававну оьхIалсса кьадар бакIрачIан бувкIсса ххюя жагьилсса инсаннал оьрмулиясса пашмансса кьиссарду. Артистътурал хъинну бюхханну аьч бунни наркотикирттал инсан цукун ясир ан бюхъайссарив ва мунил ххяппула ххассал хьун цуксса жапану буссарив. Композиция ххал бан бувкIун бия ДГУ-рал юридический факультетрал студентътал, МахIачкъалаллал Технический колледжрал ва Каспийскаллал Механический колледжрал дуклаки оьрчIру.
Акциялий гьуртту хьунни: ДР-лул ХIукуматрал Жяматийсса мюхчаншиврул отделданул каялувчи МахIаммад Гъазиев, ДР-лул ХIукуматрал Мюхчаншиврул Советрал аппаратрал отделданул каялувчи Давуд Унчиев, ДР-лул Наркотикирттайн къаршисса комиссиялул маслихIатчи Герман Шахвеледов, МахIачкъала шагьрулул наркотикирттайн къаршисса комиссиялул хъунама Равшан ХIажибалаев, МахIачкъала шагьрулул Жяматийсса мюхчаншиврул отделданул хъунмур пишакар Тавус Рамазанова, МахIачкъала шагьрулул АдминистрациялучIасса наркоманиялул профилактикалул хъунмур пишакар Нурият ХIусайнова, ДР-лул МВД-лул наркотикру ишакаш баврил ялув бавцIусса управлениялул отделданул каялувчи, полициялул майор Надежда Сайпуттинова, Республикалул Наркологический диспансерданул психолог Мариям Сулайманова.
Композиция ккаккан бан хьхьичI экспертътурал бувсунни оьтту-ттурчIайн наркотикирттал цукунсса зарал биян бан бюхъайссарив, цал ишла байхтува миннуйн вардиш уллалисса, ня зия дуллалисса, цIуну бувксса синтетическийсса препаратирттая.
Акциялул лагрулий залдануву щябивкIминнайх бавчIуна наркотикирттайн багьайсса буклетру.
Артистътурал бусласимунил лях-карах ккаккан дунни наркотикру хIасул шаврия, вай Аьрасатнавун бучIаврия, инсаннал ДНК-лийн вайннул биян буллалисса заралдания ва наркотикирттал ясирданухьхьун ирияврия бусласисса видеороликру. Композиция ххал бувну махъ театрданул хъунама режиссер Аслан МахIаммадовлул бувсунни акциялул лагрулий ккаккан буллалисса Апанни Къапиевлул аьрали чичрурду гьануну лавсъсса «Невыплаканные слезы» спектакльдания. КIицI лавгуна спектакль хас бувну бушиву Хъун дяъвилий фашизм духлаган даврил ххуллий жан дуллусса солдатнал аьпалун.
«ХIакьинугу Аьрасатнал аьралитал буссар жула билаятрал мурадру буруччаврил цIаний Украиннал аьрщи неонацистътурацIа марцI дуллай», – увкунни ванал.
Щалагу Аьрасатнал месячник дуллалиссар Аьрасатнаву закондалий бакъа наркотикру ишакаш баврийн къаршисса паччахIлугърал программалул лагрулий.
Акция шайссар гьарца шинал майрал 25-нния июнь зурул 26-ннийн Наркоманиялийн къаршисса кьинилун хасну.
Наркотикирттайн къаршисса месячник дуллалиссар наркотикирттацIун дархIусса тахсиркаршивурттащал талатаврих жяматрал къулагъас ххи даву, балугъравун къабивми ва балаллуя буруччин бансса чаранну лякъаву мурадрай.
