Цуксса хIайпнугу, чан хъанай бакъар бугьарасса оьрмулий цивппалу ливчIсса инсантал, мукунма гьарза хъанай бур «мушакъатшиву» дусса, ялапар хьунсса къатта-къуш бакъасса, чил цIимилухун багьсса инсантал. Оьрмулул захIматсса тагьарданухун багьсса инсантуран аьркин хъанай бур социал иширттал къуллугъирттал зузалтрал чулухасса кумагру. ХIакьинусса кьини укунсса инсантуран шайсса кумаг бан хIадурну бур социал къуллугъирттал идарарттал зузалт.

ДР-лул социал иширттал къуллугъирттал идарарттайн кумаграл хъирив бувксса инсантурал мурадру анаварсса мутталий щаллу буллай зий бур 4000-нния ливчусса пишакартал.
Аякьагу, хъуннасса ссавургу дан багьлагьисса дур гьарца кьини вай идарарттал зузалтрал дуллалисса даву. Шиккусса зузалтрал оьрмурду хас бувну бур кумаграх мюхтажшиву дусса инсантуран. Инсантурал социал гарантияртту цIакь дурну дур билаятрал Конституциялий. ХьхьичIва-хьхьичI вайннувун бухлай бур кулпатирттансса, ниттихъансса, мушакъатминнансса ва оьрмулул бугьараминнансса паччахIлугърал чулухасса пособияртту ва кумагру.

ЗахIматрал министерствалул хьхьичI бивхьусса агьамми ма­съаларттугу бур мюхтажсса инсантуран хIукуматрал чулухасса кумагру дузал баврил цIанийсса. Республикалул ЗахIматрал министерствалул ведомствалий бур агьали социал къуллугъирттал дузал байсса 78 идара.

Вайннувун бухлай бур, 1172 инсаннан кIану бусса, социал иширттал агьалинаха къуллугъру буллалисса 6 идара, оьрмулул бугьара хьуминнансса ва муша­къатминнансса 3 интернат-къатта, 1 психоневрологиялул интернат, 1 аькьлу-кIулшилул ма­хъун багьсса оьрчIансса интернат ва 1 ялапар хьунсса кIантту бакъаминнансса социал идара.

Республикалул шагьрурдай ва районнай бур агьали социал иширттал чулуха буруччайсса 52 идара. Вайннувунгу бухлай бур, ужагъирттайн бувкIун, агьалинан кумагру буллалисса 212 отделение, 44 отделение бур дяхтта бугьарасса ва мушакъатсса инсантал кьамул бувайсса, 5 отделение бур ужагъру бакъа ливчIсса бугьарасса инсантурансса.
ЗахIматрал министерствалул биялдарайсса 20 отделение бур оьрчIру бусса кулпатирттан социал иширттал кумагру бувайсса.

2021-ку шинал социал ишир­ттал кумагру бувну бур 146, 1 азара угьара хьусса ва мушакъатсса инсаннан ва оьрчIру бусса 11 азарва кулпатран. Мукунма, аякьалийн лавсминнал ахIвал-хIал хIисавравун лавсун, хасъсса кумагру буллай буссар социал, медициналул, ихтиярдал ва цаймигу иширттал хIакъираву.