АьФ-лул Федерал Собраниялул Федерациялул Советрал Председатель Валентина Матвиенко июньдалул 8-нний Москавлив хьунабавкьунни Сергей Меликовлущал.

Шикку гьуртту хьунни Федерациялул Советрал Элмулул, дуккаврил ва культуралул комитетрал председательнал цалчинма хъиривчу Илияс Оьмаханов.
«Регион сивсуну хьхьичIун­май най бур. ЦIанасса ппурттуву жу хIадур хъанай буру Петербурграл дунияллул халкьуннал дянивсса Экономикалул форумрайн, ваний Дагъусттаннал стенд ккаккан датIиссар цалчин», – кунни Республикалул каялувчинал. Бувсунни субъектрал ларсшиву чIярусса предложенияртту личIи-личIисса арардаву хIала-гьурттуну зузаврил хIакъираву.
Валентина Матвиенкол пикрилий, къулагъас дуван аьркинну дур региондалул ялапартуран ляличIину агьамшиву ду­сса арардах.
Сергей Меликовлул тIиму­нийну, агьамсса иширан ккаллиссар «Газпром» ПАО-лущал дурсса кьутIи регион газрал дузал даврил план бартдигьаву мурадрай.
– Пландалий бур мукунма кьутIирду чичин РАН-далул ва дуккаврил идарарттал дянив. Му аралуву жу зий буру Аьрасатнал вузирдавун жула оьрчIру бухланшиврул, бюджетрал кIанттурду гьарза баврил масъаларттаха, яла вузру къуртал бувсса пишакартал жула региондалийн зана хъананшиврулсса шартIгу хIисавравун ларсун, – кунни Дагъусттаннал БакIчинал.
Валентина Матвиенкол хъинчулийсса кьимат бивщунни Дагъусттаннай дуллалисса давурттан.