Лихъачалтращал хьунаавкьунни

Июньдалул 8-нний ДР-лул захIматрал ва социал иширттал министр АьвдурахIман МахIмудов ивунни Къарабудахкантуллал райондалийсса «Лотос» тIисса Спортрал ва цIуллушиву цIакь даврил комплексрайн.


Министрнащалсса даврил аьрххилий гьуртту хьунни ДР-лул Халкьуннал Мажлисрал депутат, ЦIуллушиву дуруччаврил, захIматрал ва социал политикалул комитетрал председательнал хъиривчу ХIасан ХIусманов, «Опора России» тIисса ДР-лул региондалийсса отделениялул председатель Зульгимар Тагьибова.
ХIакьинусса кьини комплексрай бигьалаглагисса инсантуравух бур Луганскаллал ва Донецкаллал республикарттаясса лихъачалтгу. Шикку, шанна чIумухсса дукралул дузалгу бувну, цинярда шартIру дусса къатраву ялапар хъанай бур мюрщисса оьрчIащалсса инсантал. Шиккува кIицI лаган, ва комплексрай уттинингу кьамул буллай бивкIссар Донецкаллал ва Луганскаллал республикарттаясса лихъачалт.

Ва аьрххилий министрнал ххал диргьунни мушакъатшиву дусса оьрчIан реабилитациялул кумагру баву мурадрай, ЗахIматрал министерствалул чулуха итадаркьусса грантрал лагрулийсса давуртту дузрайн дуккан даврил тагьар. АьвдурахIман МахIмудовлул цIувххунни ци аьркинну дуссарив ва цукун ялапар хъанай буссарив комплексрай бигьалаглагисса лихъачалт. Министр мукуна хьунаавкьунни гъинттул комплексрай личIи-личIисса мероприятияртту дуллалисса волонтертуращал.

Комплексрай зузисса пишакартурал бусаврийн бувну, реабилитациялул кумагру аьркин­сса оьрчIансса грантрал лагрулий итадаркьусса арцух шикку хIасул дурну дур «иппотерапиялул», арт-терапиялул, сенсорный ва цаймигу упражненияртту бувайсса тренажерду. ОьрчIансса реабилитациялул курсру буллай бур Каспий хьхьирил зуманив. Шикку оьрчIан ва миннал нитти-буттан украсса дукия ва уква ялапар хьунсса шартIру дузал дурну дур.
Нитти-буттал ва психологтурал бусаврийн бувну, 10 гьантлул мутталийсса реабилитациялул курсру бувсса оьрчIал цIуллушиврун хъунмасса кумаг хъанай бур.