Июньдалул 22-мур кьини хъанай дур жула цинявнналагу тарихрал луттирайн лархъсса кьинину. Цавагу кулпат бушиву къакIулли ва кьинилул щавщи къавщусса. Мунияту гьарца шинал ва кьини, Хъун дяъвилий Ххувшаву ларсъсса жула вирттавран хас дурсса гьайкаллачIан бувкIун, кьабагьару жува, жухва жува вичIилий, дакIнийн бичару жула-жула кулпатирттава та дяъвилий жанну дуллуми, жула тархъаншиврухлу талай бивкIми.
Муна мукунсса мурадрай, июньдалул 22-нний Ккуллал райондалул хъун шяраву Ваччав бавтIуна махлукьат дяъвилийн лавгминнан хас дурсса гьайкалданучIан. Шикку бия райондалул бакIчи Шамил Рамазанов, ванал хъиривчу Анатолий Давдиев, Ветерантурал советрал председатель Аьбдул Загьидиев, идарарттал зузалт, Ваччиял шяраваллил жямат.
ТIутIал кацIру гьайкалдануцI бивхьуну махъ махъру лавхъуна Шамил Рамазановлул ва аьрали къуллугъ кьабивтсса хIаписар Щамхал Хизриевлул. Вайннал кIицI лавгуна цукунсса балардащал жула ялун дуркIун диркIссарив та кьини. Дуруна минутIрайсса кьабагьавугу.
«ТачIав жула оьрмулуву гукунсса кьини тикрал къахьуннав» тIисса дия цинявннал зумувсса дуаь.
