Июньдалул 22-нний ДР-лул ХIукуматрал Председатель Аьбдулмуслим Аьбдулмуслимов хьунаавкьунни АьФ-лийсса Ираннал Исламрал Республикалул вакил (посол) Казем Жалалищал.
Хьунабакьаврий ххал бивгьунни республикартту уртакьну зузаврил хIакъиравусса масъалартту.
Аьбдулмуслим Аьбдулмуслимовлул тIимунийну, Аьрасатнал Федерация ва Ираннал Исламрал Республика хIала-гьурттуну зун аьркинни экономикалул, машлул, промышленностьрал арардаву, яла цачIу буккан баргъбуккавал билаятирттайнгу.
«Му ххуллий Иран ва Дагъусттан уртакьну зузаврил мяъна цахъисгу хъун хъанай дур. «МахIачкъалаллал хьхьирил порт» АО-лул чIярусса шиннардил опыт бур Ираннал Республикалул портирдащал уртакьну зузаврил. Жу ххал бигьарду дунияллул халкьуннал транспортрал коридор «Север-Юг» лядуккан даврил, МахIачкъалаллал хьхьирил порт цIу буккан баврил, «Ярагъ-Казмаляр» тIисса дазу лахъай кIану бакьин баврил ва цаймигу масъалартту.
ЛичIину ххал бивгьунни агропромышленностьрал комплексрал лагрулий хIала-гьурттуну зузаврил масъалартту, Каспий хьхьирил зуманихсса каширду ишла даврил ва цаймигу масъалартту», – кунни ДР-лул премьер-министрнал.
Казем Жалалил тIимунийну, Ираннал мурад бур АьФ-лул кьиблалул региондалущалсса хIала-гьурттушиву лядуккан даву, дахху-ласу гьарта даву, машлул ва ишбажаранчишиврул аралуву мюнпатну ишру бачин баву.
