Июньдалул 20-нний Каспийскаллал «Анжи Ареналул» аьрщарай тIивтIунни Аьрасатнал Виричу НурмахIаммад ХIажимахIаммадовлул цIанийсса Спортрал центр.
ТIитIаврий гьуртту хьунни Дагъусттаннал БакIчи Сергей Меликов, региондалул физкультуралул ва спортрал министр Сажид Сажидов, Виричунал ппу Энгельс ХIажимахIаммадов, цаймигу мачча-гъанми.
ДакIнийн бутанну, 25 шинавусса десантник НурмахIаммад ХIажимахIаммадовлул Украиннайсса спецоперациялул чIумал, захIматсса тагьардануву хьувкун, виричунал ххуллий жан кьурван дуршиву, хIакьсса хIаписарнал зумуну. Билаятрал Президентнал ХIукмулийну ХIажимахIаммадовлун дуллуссар Аьрасатнал Виричунал цIа.
Шадлугърал тагьарданий центр тIивтIуну махъ Республикалул каялувчинал ххал бунни спортрал сооружение, кIул хьунни миккусса дузалшиннаращал.
Центрданий лахьлантIий бур хъунмурчIин дандибуккавуртту, миву бур мукунма лач1унбуккултрал 1000 квадрат метралул лагрулийсса залгу. Бур мини-футболданий буклансса майдангу, баскетболданий ва волейболданий буклансса кIанттурдугу. Стадиондалул гендиректор МахIаммад Багьауттиновлул тIимунийну, залдануву ца чIумух бюхълай бур вардиш хъанан 80-90 инсаннаща.
Сергей Меликовлул ихтилат бунни Москавуллал «Динамо» академиялул филиалданул оьрчIащал, чIа кунни миннан спортраву тIайлабацIуртту.
