Агьалинал 90% кIюрх дайдишайсса дур социал сетирдай ххилтIу тIутIаврия, кувни ва ххилтIу тIутIаву хъатIаннин лахъи лагайсса дур, хIатта хъиривсса кьининийнгума. Ина уссара кIюрххил яру тIитIайхтува кару смартфондалучIан тIитIлай, мукун ясирну угьантIиссарахха ми соцсетирдал, мивун мукун кьутIинтIиссарахха, яла, такIу-макIуй, къундалул бакIува на уккан увара тIисса леххаврил ка тIиртIусса кунмасса иш бикIантIиссар.  ЭцIа миккур­хха бусса, соцсетирдавусса чIун, учиннуча, жагьилшиврул чIун сетирдавун кьувтIуну гьан дуллалавриву мюнпат цукунсса бикIанссар, гивусса хъунмур чIумул ихтилатгу оьхIалмуния, къаххуймуния бухьувкун. Чанная ва чаннамуния бакъахьувкун. Ва ялагу. Дагъусттанлувтуран ххираркьай чил оьрмурдал хъирив багьлан. «Ттун щихчIав бала бакъар!» тIисса калима бачIвасса хавардур. Ххуймуния бусан, ххуймур гьаз буван анавар буккайми соцсетирдай чанссар. Аьйрду дуллан циняв усттартал бур, махъ учин анавар бувкнува бур. Бакъануккар соцсетирдай лахъи лагавринсса дарув-дарман, хъин дуван къашай азар дур учин хьунссар сивсуну. Амма къачIаллихха утти­вагу бакIрай бацIан, хъунна­сса чIун соцсетирдан хас дуллалаврия махъаллил хьун. Чил оьр­мулул иширттал хъирив къабагьну, жуласса, жуламунилсса буллан. ЧIун чун ларгссарив къакIулну къазразанну личIлан къаччарча, арх буккияра социал сетирдая. Хайр-мюнпатну чIун гьан дуллан лахьхьияра, зуятура тIалавшинна дувара.

 Ася ХIусайнова,
журналистикалул 3-мур курс