Июньдалул 19-нний щалагу жула билаятрай кIицI ларгунни Медициналул зузалал кьини. Ва хъанай дур цала оьрму цайминнал оьрмурду ххассал баврин хас бувсса, хьхьу-кьини къаувкуну, агьалинал цIуллу-сагъшиврул къаралданий бавцIусса инсантурал пишалул байран.
Медициналул зузалал кьинилун хас бувсса, Москавлив ва Москавуллал областьрай цала пишалул буржру лайкьну бартбигьлагьисса Дагъусттаннаясса хIакинтал лахъа-хъун буллалисса шадлугърал мажлис хьунни Москавлив «У Адама» тIисса ресторандалуву. Ва сакин бувну бия «Дагъусттан» Москавуллал Культуралул центрданул. Шиккун оьвкуну бия цала давурттай бусравсса ва хIурматрайсса хIакинтурайн.
Миннавух бия Астемир Шайхаьлиев, ххинчулул восстановительная пластикалул пишакар, хирург, медициналул элмурдал доктор, «Дагъусттан» Москавуллал Культуралул центрданул вице-президент, ХIусман ХIусманов, О.М. Филатовлул цIанийсса 15-мур азарханалул анестезиологиялул ва реанимациялул отделениялул заведующий, Ризван Ильдаров, «Солист» тIисса стоматологиялул клиникалул хъунама хIакин, медициналул элмурдал кандидат, Гулизар Башанаева, «Дагъусттан» МКЦ-лул медициналул зузалтрал Ассоциациялул каялувчи, психологиялул элмурдал кандидат, Тутубава Башанаева, М.В. Гольцлул цIанийсса ЦГБ-лул неврологиялул отделениялул хъунмур, Арсен Оьмаров, радиациялия мюхчан бавриха зузисса хIакин, онколог, ТIагьир МахIаммадов, ДЗМ-рал 13-мур ГКБ-лул хирург, Шамил Къапланов, стоматолог-ортопед, имплантолог, «Мадера Дент» тIисса стоматологиялул клиникалул хъунама хIакин ва м.ц.
Мероприятие тIитIлай, хIакинтал барча буллалисса ихтилат бунни «Дагъусттан» МКЦ-лул Президент, профессор, АьФ-лул Аьралий элмурдал академиялул академик Арсен Буйдалаевич ХIусайновлул. Ванал кIицI лавгунни хIакиннал пиша мудангу ца яла бусравмур, сий думур бивкIшиву. ХIакьинусса кьинигу хIакинтурал, инсантурал цIуллу-сагъшиву дуручлай, хъуннасса ва бигьа дакъасса хъар лархъун бушиву.
«Москавлив ва Москавуллал областьрай ялапар хъанай ва цала-цала давурттай хьхьичIунну зий бур 8 азарунния ливчусса медициналул зузалт: хIакинтал, медсестрахъул, аспирантътал, ординатортал, студентътал. Вайннал лархъун нанисса хъар бигьасса дакъар, цала пишалул бурж бартбигьлай, вай мудангу агьалинал цIуллу-сагъшиврул къаралданий бавцIуну бур. Ва хъунмасса гужгу, гьавасгу, ххишаласса цIимигу аьркинсса давур.
Зул даврил ккаккияртту, кьадру-кьимат зу ххассал бувсса 100-хъул инсантурал оьрмурдайну исват хъанай бур», – увкунни Центрданул Президентнал.
Хъирив ва шинал цала давурттай ххуйсса ккаккияртту чIалачIи дурсса хIакинтуран дуллунни наградартту. Вай дулун мажлис бачин бувсса Ислам ИсабахIандовлул оьвкунни Арсен Буйдалаевичлуйн. «Дагъусттан» МКЦ-лул чулуха «За верность Дагестану» медаллу дуллунни Астемир Шайхаьлиевлун, ХIусман ХIусмановлун ва Ризван Ильдаровлун.
Астемир Шайхаьлиев хъунмасса кумаг буллай ур жула дагъусттанлувтал Москавуллал клиникардай уттубишин бан, хъин бан. Нанисса шинал апрель зуруй ванал лайкьну дурурччуссар медициналул элмурдал докторнал диссертация.
Х1усман ХIусмановлул хъунмасса кумаг бувссар дагъусттанлувтуран пандемиялул чIумал. Апрель зуруй цала отпускалул чIумал, Луганскалийн лавгун, уква хъин буллай ивкIссар хасъсса операциялуву гьуртту хьусса жула аьралитал.
Ризван Ильдаровлулгу цаламур пишалуцIун бавхIусса кумаг бувай жула халкьуннан. Му бакъассагу, ва мудан чIарав ацIай «Дагъусттан» МКЦ-лул дуллалисса давурттал.
Цала чулуха наградартту ларсъсса хIакинтурал барчаллагь увкунни «Дагъусттан» Москавуллал Культуралул центрданухь. Медициналул зузалт барча буллалисса ихтилатру бунни Астемир Шайхаьлиевлул, Ризван Ильдаровлул, Шамил Къаплановлул, Гулизар Башанаевал. Гулизар Башанаевал кIицI лавгунни, Москавуллал медициналул идарарттай хьхьичIунну зий, лавайсса даражалул пишакаршиву ва инсаншиву ккаккан дуллай бушиву жула ватанлувтал. Барчаллагь увкунни мудангу кувннал чIарав кувгу, цIуллу-сагъшиврулшиврий Дагъусттанная бувкIсса ватанлувтуралгу чIарав бацIан хIадурну бушиврухлу, цIими бушиврухлу, хъиншиврухлу. Арсен Оьмаровлул барчаллагь увкунни мажлисрал сакиншинначитурахь, цала захIматран лайкьсса кьимат бищаврихлу.
ХIакинтуран хас бувну цила чивчусса шеъри бувккунни «РЖД-Медицина» ЧУЗ ОАО ЦКБ-лул лабораториялул зузала Ххадижат ЦIаххаевал.
Пишарду чIявусса бур
Кувннияр кув ххаллилсса,
ХIакиннал пиша тIурча,
Агьаммурну хъанай бур.
Дяъвилуву талайсса
Вирттавраха лавхьхьуну,
ХIакиннангу багьлай бур
Азарданущал талан.
ЧIявусса хIакинтал бур
Заннал кьудрат дуллусса,
Пишалул кьимат буну
Къашайшалт хъин буллайсса.
ХIакиннал захIмат пиша
Кьадру буну лякъиннав,
ХIакиннал бай захIматран
Заннал кьимат бищуннав.
Мажлисрал гьурттучитурал цIанияту Тутубава Башанаевал барчаллагь увкунни Арсен Буйдалаевичлухь, ххаллилсса байрандалухлу, ванал каялувшиндаралусса «Дагъусттан» МКЦ-лухь, Москавлив ялапар хъанахъисса дагъусттанлувтал цачIун баву мурадрай бихьлахьисса хъунмасса захIматрахлу.
Мажлис цала балайрдайну ва къавтIавурттайну чIюлу бунни машгьурсса культуралул ишккаккултрал: ГИТИС-рал выпускниктурал, актер ва балайчи Ислам ИсабахIандовлул, машгьурсса балайчитал Фатима Лакиял ва Аленал. Мероприятиялул гьурттучитал хъиннува тяхъа-таза буккан бунни вайннал дурсса викториналулгу. ХIакинтуралгу ккаккан бунни цанма, инсантал хъин буллан бакъассагу, авурну къавтIун бизангу кIулшиву. Мероприятие лавайсса даражалий ва сакиншиндарай ларгунни.
