Майрал 9-нний Ккуллал райондалул школарттал дуклаки оьрчIру, шяраваллал жяматру, жагьилтал, культуралул зузалт цала-цала буттахъал, гъан-маччаминнал суратирттащал цачIун хьуна, Хъун дяъвилул Виричу хьусса, ЧIяйннал шяравасса ЦIаххуй Маккаевлул гьайкалданучIа. «БивкIу бакъасса полкравух» гьуртту хьун бувкIун бия ч1явуми аьрали яннардаву. Маршрал хьхьичI ия Ккуллал райондалул бакIчи Шамил Рамазанов ва МахIачкъалалия бувкIсса хIурмат лавайсса хъамал.
ЦIаххуй Маккаевлул гьайкалдануцI тIутIал шалка бивхьуну махъ, аьрали макьандалущалсса машина хьхьичIну, агьали бавчуна Ваччиял шяраваллил чулинмай. Вайннал хьхьичIгу най ия 2 аьрали бурттигьу. Кьюкьа дуркIуна Ваччиял майданнив. АхIмад-Хан Султаннул гьайкалдануцI вайннал тIутIал шалка бивхьуна.
Микку махъ лавхъуна Шамил Рамазановлул. Ванал бувсуна цукунсса чувшивуртту дурссарив лакрал миллатрал чиваркIуннал. КIицI лавгуна кIийла СССР-данул Виричу, 1-мур ЦIувкIратусса АхIмад-Хан Султан, дакIнийн увтуна СССР-данул Виричу ЦIаххуй Маккаев ва цаймигу вирттал. Хъун дяъвилий гьуртту хьусса минная бувсуна райондалул Ветерантурал советрал председатель Аьбдул Загьидиевлул. Райондалул жяматрахь байрандалул кьини барча дуруна шагьрулия бувкIсса хъамаллуралгу: Адамов АьвдурахIманнул, Абакаров Жабирдул, Ккуллал райондалул имам МухIаммадлул.
Мунияр махъ митинг хьуна Культуралул къатрал хIаятраву. ТIутIив дирхьуна Ккуллал райондалул вирттаврал суратирттачIа. Митинг дачин дуруна аьрали майор Щамхал Хизриевлул. Ванал бувсуна митинг хас дуршиву Украиннаву нанисса хасъсса аьрали операциялуву жан дуллусса Аьрасатнал Виричу, Энгельслул арс НурмахIаммад ХIажимахIаммадовлун. Баян бувна райондалул ОьрчIал ва жагьилтурал спортрал школалун НурмахIаммадлул цIа дизлазишиву. Ваччиял школалул оьрчIал дурккуна Виричунан хас дурсса декламацияртту. Хьуна НурмахIаммадлул оьрмулия бусласисса ихтилатру. Виричунал буттауссу, Къяннал шяраваллил администрациялул бакIчи Малик ХIажимахIаммадовлул лавхъуна махъ.
Администрациялул чIаравсса спортшколалул чIирай тIиртIуна Виричунал цIанищалсса ула. Дирхьуна шиккугу тIутIив. Муния мукьах шяраваллал культуралул зузалтрал ккаккан дуруна концерт, хьуна жагьилтурал дянивсса спортрал бяст-ччаллу.
