Москавлив вирттаврал гьаврдай тIутIив дирхьунни

Москавлив вирттаврал гьаврдай тIутIив дирхьунни

Гьар шинах кунма, гьашинугу Москавливсса Дагъус­ттаннал диаспора Ххувшаврил кьини, Совет Союзрал кIийла Виричу АхIмад-Хан Султаннул ва цIа ларгсса спортсмен-парашютист Наби Аминтаевлул гьаврдай тIутIив дишин, вай дакIнийн бичин, бавтIунни Новодевичье хIатталлийн.

БавтIцириннавух бия Москавуллал «Дагъусттан» Культуралул центрданул, Дагъусттаннал Постпредствалул, Жяматийсса советрал, Мариян Илиясовал цIанийсса «Дараччи» фондрал Москавливсса филиалданул ва «Лакия» тIисса Лакрал жагьилтурал ккурандалул вакилтал. Культуралул центрданул каялувчи, профессор Арсен ХIусайновлул кIицI лавгунни Москавливсса лак бюхттулсса арсурваврал гьаврдайн батIаву ччянира цIакь хьусса аьдат душиву, АхIмад-Хан Султаннул ва Наби Аминтаевлул оьрмурду уттисса никиран чувшиврул ва бюхъу-гьунарданул дарсруну бушиву. «Ххувшаву ларсъсса 1945-ку шиналсса инттуния шихуннай цими шин гьарчагу, Аьрасатнан ва Аьрасатнал халкьуннан ванияр чаннасса, чIа тIисса цамур байран дакъар. Ва байрандалуву дур совет агьалинал бюхттулшиву, къирият ва ххув хьусса никирал чувшиву, къумашиврул дардру ва хьунабакьавурттал ххаришиву», – увкунни Абас Аьлишаевлул. АхIмад-Хан Султаннул ва цинявппа фронтовиктурал аьпалул хIурмат лахъну ябуван жула бурж бушиврия бунни ихтилатру ХIажи Аьлиевлул, Гулизар Башанаевал, Лакрал жагьилтурал ккурандалул хъунама Жамалуттин Оьмаров-Батыровлул, АхIмад-Хан Султаннул ниттийхчIинсса ссурахъу Алла ХIусмановал ва цаймигу бусравсса инсантурал.
«Ххувшаврил кьини – му жува циняв цачIун буллалисса ва кьини дурксса чIумал кьянкьану ппухълуннал чувшиврул тарих тикрал буван хIадурсса наслу бушиву ккаккан буллалисса байранни. ХIакьину Украиннавусса спецоперациялуву Аьрасатнал ва хасну Дагъусттаннал вирттаврал кка­ккан бунни цивппа цинияргу ватандалул мурадру хьхьичIунсса къучагътал бушиву. Дагъус­ттаннал арснал НурмахIаммад ХIажимахIаммадовлул Аьрасатнал Вирттаврал кьюкьлуву язимур ххуттай личIансса чувшиву дунни», – увкунни Астемир Щайхаьлиевлул. Махъру лахълахъими, ца зумату кунма, АхIмад-Хан Султаннул ва Наби Аминтаевлул цIарду миллатрал цIа бюхттул дурминнал бакIххуттай душиврий чIурчIав дуллай бия. Хъин-хъинсса махъругу лавхъун, гьаврдай тIутIивгу дирхьуну мукьах, рирщуна цачIусса суратругу хъамакъабитулун.
Арсен ХIусайновлул барчаллагь увкунни Новодевичье хIатталливсса Вирттаврал гьаврдай тIутIив дишин бувкIсса лакрал жагьилтурахь. «Жу жулва буржиран ккалли бувару жула бюхттулсса шяравучунал аьпалул хIурмат баву, оьрчIнияцIава тарбиягу хьуссару АхIмад-Хан Султаннул оьрму эбратну ккаклай», – тIий бия ЦIувкIуллал жагьилталгу. Муданма кунма, тамансса бия бавтIцириннаву цIувкIулгу.

 

1

Аватар

Патимат Рамазанова

Заслуженный работник культуры РД

Читайте также: