Хъун дяъвилул хьхьичI шиннардий Ххюлусматусса КъимпIаев Адам МахIмудлул арс учительну зий ивкIссар ЧIурттащиял шяраваллил школалий.
Ххувшаврил кьинилийн
ХьхьичIвагу кIулсса ухьувкун, къатта бувгьуну авцIуну ур ттул нитти-буттачIа. Хъиншиврулгу, инсаншиврулгу бутIа ххину буллусса Адам ттул нитти-буттал цала оьрчIая личIи къаайсса ивкIун ур.
Хъун дяъви байбивхьусса гьантрай Адам МахIмудович цала хушрай фронтрайн лавгун ур. Кулпат АьйшачIа ливчIун бур мукьва мюрщисса оьрчI: Бибулат, Мансур, Маданият, Биасабижат. Къатлува увккун нанийни, кулпат Аьйшайн оьрчIру аманат буллай, увкуну бур: «Аьйшай, утти щалла хъар вийнни дагьлагьисса, ттул оьрчIаяту ххуйсса инсантал бан хIарачат бува», – куну. Ласнал аманат лайкьну щаллу бувну бур Аьйшалгу.
Адамлул дяъвилул ххуллу Украина душманная ххассал буллалисса хьуну бур.
Биасабижат тIимур душнил ккаккан бувсса документрай дур укунсса чичру: «В приказе 635 стр. полка №4 от 8,6.44 года значится: бывший командир взвода 217 арм.зап.полка младший лейтенант Кимпаев Адам Махмудович назначается командиром взвода птр 1-го стрелькового батальона. Ниже —- офицер раненный 6.7.44 г. в боях с немецкими захватчиками и убывший на излечение в медсанбат Ковельского р-она сел. Облапи Волынской области погиб от полученных ран в 1944 году 7 июля».
Ппу увччусса кIану кIул хьуну махъ, мукьагу оьрчI-душ бивну бур цимилгу цала буттал гьаттайн. Адамлул чIивимур душ Биасабижат буслай бур: «Ттул уссу Бибулат, полковник, мудан къуллугъ буллай ивкIссар Украиннай. Танал кумаграйхчин, ттула душ Зайнабгу бувцуну, шиха тихун лавгун, бияйссияв ппу увччусса кIанттайн, 964 инсан увччусса «Уссурваврал гьаттайн».
Утти цири хъанахъисса? Оьттух къанихсса тай бандеровцынал ва неонацистътурал ххуйра-ххуйсса хIукуматгу зия дурну, жуйнмагу къарщину бувккунни. Нава бугьара хьуну бунугу, ттун гьарзат бувчIлай бур, чIалай бур», – тIий бур Биасабижат.
Ттул уссил кулпатгу украин душъя, уссия кIия оьрчI. Учин ччимур вари: утти жул уссилгу, бутталгу гьаврду лирчIунни ятсса билаятрай. Шайссарив утти жуща буттал ва уссил гьаттардийн бияван? Тихун нанисса чIумал ттун Дагвоенкоматрал ххуллунхаржгума булайссия.
Я Аллагь, буручча жул жагьилсса арсру, чил аьрщарай нясив мадарача миннан абадул мина!
ХIусайн Давыдов,
ш. ЧIурттащи
