Ларгсса хамискьини Къумукьнал театрдануву хьунни хъуна­сса композитор, СССР-данул халкьуннал артист, Аьрасатнал ЗахIматрал виричу Мурад Къажлаевлул музыкалул концерт-вечер.

КIива бутIуйх дарчIуну дия концертрал программа. Цалчинмур бутIуй хъунмур хормейстер Эмилия Шихрагьимовал каялувшиндаралу Дагъусттаннал опералул ва балетрал театрданул хорданул щаллу бунни Расул ХIамзатовлул «Балай ляхъаву» тIисса шеърилия ва М. Лермонтовлул ва А. Пушкиннул произведениярттая сакин хьусса «Балай ляхъаву» тIисса вокально-хоровой цикл.
Хорданул мукунма увкунни Къажлаевлул цала кулпатран Валидан хас бувсса произведенияртту – «Оьргърал канишрал ссигъа» тIисса кинофильмрава­сса «Эшкьилул цинявппа махъру» ва «Валида» оперетталувасса «ЯтIул гьивчру бивну бур».

КIилчинмур бутIуй ДР-лул халкьуннал артист, дирижер Новруз Шахбазовлул каялувшиндаралу симфонический оркестрданул Дагъусттаннай цалчин щаллу бунни цIу буккан бувсса Симфоническая поэма «28 виричу – Панфиловцынал аьпалун». Произведение хас бувну бур Буттал кIанттул цIанийсса Хъун дяъвилуву ватандалухлу къучагъну талай бивкIсса совет аьралуннал бюхттулсса чувшиврун. Симфоническая поэма «Па­мяти 28 героев – Панфиловцев» цалчин щаллу бувну бур 1954-ку шинал Бакуйннал паччахIлугърал филармониялуву. Вирттаврал сипатру яргну ккаккан дуллалисса бюххансса музыкалул яла къалагайсса асарду кьабивтун бур вичIидихьултрал дакIурдий.

1959-ку шинал Мурад Къажлаевлул гьалмахчу ва уртакь, композитор Сергей Агабабов увкIун ур МахIачкъалалийн паччахIлугърал музыкалул издательствалул директор Фортунатовлуясса чагъар лавсун, «28 панфиловцев» симфоническая поэмалул партитура рищун кьамул дурну, мунил оригинал анаварну Москавлив тIалав дуллай бушиву бусласисса. Оригиналданул партитура тIайла дурккун дур цала 33 шин кIицI дан махъунай анавар уклакисса Агабабовлухьхьун.

Амма хар-хавар бакъа хьуну бур оьзру. Авиакатастрофалуву ивкIуну ур Сергей Агабабов, ччурччуну дур поэмалул партитура. Яхьуну дур, анжагъ, цаппарасса черновойсса вариантру, цивгу оригинал бат хьуну махъ багьну бур бутIра-бутIрай датIлан.

«На хъунмасса хIаллай луглай уссияв черновикирттах, дакIнийн бичлай уссияв партитуралувасса бутIри, батIлай уссияв чIурдайну, низамрайн буцлай уссияв ттула цалчин­сса хъунмасса произведение», – дакIнийн бутлай ур Мурад Къажлаев.
ХIакьину, сайки дачIи ттуршуку ларгун махъ, произведение цIунилгу цалчин бувккунни дунияллийн.
«28 панфиловцев» симфоническая поэмалул музыкалунгу, тайннал цала виричувшиврун кунма, бивкIу бакъассар.