Бакуйгу ккаккан дунни кино

Бакуйгу ккаккан дунни кино

Май зурул 20-нний Азирбижаннал хъуншагьрулий, Бакуй, ккаккан дунни «Аманат» тIисса Аьрасатнал кино.

Дагъусттанная Бакуйн кино ххал дан бувкIсса делегациялувух бия АьФ-лул Советрал элмулул, кIулшивуртту дулаврил ва культуралул комитетрал председатель Илияс Умаханов, АьФ-лул ПаччахIлугърал Думалул депутат АьбдулхIаким ХIажиев, Дагъусттаннал вице-премьер Муслим Телякавов, Дагъусттаннал Халкьуннал Мажлисрал миллатирттал политикалул, жяматийсса масъаларттал, диндалул цачIушиврул ва парламентирттал дянивсса дахIавурттал комитетрал председатель Анатолий Карибов, ДР-лул культуралул министр Зарема Буттаева. Мукуна гьуртту хьунни кинорал продюсер ва сценарист Шамил Жаппаров ва Аьрасатнал халкьуннал артист Андрей Соколов.

Кино дайдишин хьхьичI ихтилат буллай, региондалийсса культуралул ведомствалул каялувчинал кIицI лавгунни премьерану хъанахъисса «Аманат» тIисса тарихрал драмалиясса кино Азирбижаннаву ккаккан даву кинематографиялул культуралул давривусса агьамсса ишну хъанахъишиву.

– Азирбижаннащал жулла дуссар цикссагу шиннардий цIакь хьусса уссурвалшиврийсса хIала-гьурттушиву. Азирбижаннал халкьуннава бувксса, дунияллийх цIа дурксса культуралул, искусствалул, экономикалул ва цаймигу арардаву хьхьичIун ливчусса инсантуращалсса дахIавуртталгу хъунмасса асар биян буллай бур кIивагу миллатрал дянивсса дусшиврул гьанурду цIакь баврийн, – увкунни Зарема Буттаевал. Ванил мукунма кIицI лавгунни Аьрасат-Азирбижаннал культуралул дахIавуртту хьхьичIуннай хъанахъавриву хъунмасса бияла бушиву Дагъусттаннал халкьуннал шаэр Расул ХIамзатовлул творчествалухьгу. Зарема Буттаевал, сант дирирну дунура, Расул ХIамзатовлул 100 шинал юбилейран хас дурсса мероприятиярдавух гьурттушинна дан Дагъусттаннайн оьвкунни Азирбижаннал миллатрал культуралул, литературалул ва политикалул иширттал вакилтурайн.

Премьера дайдишин хьхьичI Шамил Жаппаровлул бувсунни кино ласласийни группалул дурсса давурттая, хьунадакьлай диркIсса захIматшивурттая.
Кино ларсъссар Санкт-Петербурглив ва Дагъусттаннай Гъуниннал райондалий, «Даггер Фильм» тIисса киностудиялул цIанихсса творчествалул командалул, Аьрасатнал Культуралул министерствалул ва Кинорал фондрал чIарав бацIаврийну.

Гьанумур сюжет бур Имам Шамиллул арс Жамалуттиннул генералнал душ Лиза Оленинах дурсса ччаврил кьадарданиясса. Киноравусса ишру бур 19-мур аьсрулий хьусса драмалул иширттал гьанулий лавсъсса. Агьамми рольлу дугьлай бур Андрей Соколов, Екатерина Гусева, Даниил Страхов, Амин Хуратов, Варвара Комарова, Арслан Мурзабеков ва цаймигу. Режиссертал – Антон Сиверс, Рауф Кубаев.
Прокатрайн кино дуккантIиссар май зурул 26-нний.

Аватар

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: