Цалчинми тамашачитуравух

Цалчинми тамашачитуравух

Тарихийсса драма «Аманат» ххал буван Москавуллал «Октябрь» киноцентрданийн бавтIминнавух бия Дагъусттаннал культуралул центрданул президент Арсен ХIусайнов бакIчисса делегациягу. Бия Мариян Илиясовал цIанийсса «Дараччи» фондрал Москавуллал филиалданул душругу.


– Жува циняв ссавур дакъа ялугьлай бивкIру ва киносуратрах. Санкт-Петербурглив ва Гъунив ларсун дур ва киносурат. Жунма пахрулунсса ишри ва сценарист ва продюсер ЧIурттащиял шяравасса Шамил Жаппаров ушивугу. Ванал цала премьералий увкунни киносуратрал гьанумур мяъна-мурад – Аьрасатнаву, агьлу, миллатру ва динну личIи къадуллай, бавкьуну, нахIуну яхъанан аьркиншивур куну, – увкунни Арсен ХIусайновлул.

Имам Шамиллул арснан эшкьи хьусса Лиза Оленинал ниттил роль дургьусса Екатерина Гусевахь барчаллагь увкунни «Дараччилул» душваврал, ххаллилну роль дугьаврихлу. Навагу ххи буванна: уттинин Дагъусттанная ва дагъус­ттанлувтурая ва кутакрал лагрулий кинематографиялул мазрай бувсъсса иш тарихраву хьусса ххай бакъара. Ххуй чулий Да­гъусттанная, Да­гъусттаннал вирттаврая гъалгъа тIисса ппурттуву ва киносуратгу жулла цIа-кьини гьаз дувавриву биял­сса бутIану хьунссар. «Киносуратрал мукунсса яргсса асар биян буннихха, та чIумалсса иширттаясса информациялух луглай, ккалай бивкIра, ттун Да­гъусттаннал тарихрая чIявусса затру къакIулну бивкIун бур, лахьхьин бур. Ххуй ивзунни актер Амин Хуратов. Дагъусттаннал зунттурду буниялттунгу мукссава ххуйсса буссарив?

ЗучIан биян аьркинни чара бакъа, зунттурдугу ккаккан, ватандалух­сса ччаву ялтту дуккайсса жагьилталгу ккаккан, цинияргу аманат хьхьичIунсса ва мунил хIурмат бюхттулсса агьулданущал щябикIан-бизангу. Политика ва ччаву, дяъви ва оьрму, абадун агьалинал дакIру гьулусан дуллалисса суаллу ва щугълурду бакIраву хIасул буллали­сса кино дия, – тIий, чивчунни ттучIан Москавливсса коллега Анна Решутовал.
Ххал дуванну журагу «Аманат».

Аватар

Патимат Рамазанова

Заслуженный работник культуры РД

Читайте также: