Ларгсса бигьалагай кьини Москавливсса Дагъусттаннал диаспора цачIун бавтIун бия «Дагъусттан» Культуралул центрданул вице-президент, Икрамлул арс Щайхаьлиев Астемирдул медициналул элмурдал докторнал цIа ласаву барча дуван. Культуралул центрданул президент Арсен ХIусайновлул бувсунни Астемир хъунмасса бусраврай ва сийлий ушиву Дагъусттаннал диаспоралул ва Москавуллал агьулданул дянив. Культуралул центрданул чулуха пишкаш дунни ххаллилсса тур.
Профессор, цалчинмур ранграл капитан ХIажи Аьлиевлул кIицI лавгунни, цала даврил хьхьичIунсса пишакар ушивруцIун, Астемир ххишала акъа Дагъусттан, Лакку кIану, буттал шяравалу ххирасса патриотгу ушиву, гъан-маччаминнал чул бищу ушиву.
Астемир Щайхаьлиев лавайсса даражалул преподаватель ушиву, архIал зузиминналгу, каялувшиву дуллалиминналгу, студентътуралгу дянив личIинува сий дуну, хIурматрай ушиву бувсуна ванал даврил уртакь, медициналул элмурдал доктор Сяъдуллагь Абакаровлул.
Культуралул центрданул активист, царагу ккалли дансса даву лях гьан къаритайсса, творчествалул чулухагу итххявхсса Заурбаг Нахаевлул бувккуна цIусса доктор барча уллалисса цала шеъри.
Астемир Щайхаьлиев барча уллалими, ца зумату кунма, кIицI лаглай бия ва, гьунар бусса аьлимчу ва хIакин ушивруцIун, дакI-аьмал хъинсса, аьчухсса, иширайну чIарав ацIайсса сахаватлувгу ушиву. Уссил мажлис хъун буван бувкIун бия Тула шагьрулий хIакинну зузисса ссу Зарема ва ЦIуссалакрал райондалул Пенсион фондрай каялувшиву дуллалисса уссу Назим.
Арсен Буйдалаевичлул кIицI лавгуна Назимгу Лакку кIану ххирасса, жяматраха, буттал шяраваллиха аякьа дуллалисса, уртакьтурал ва агьалинал дянив хIурматрайсса инсан ушиву. Бувсуна ванал гьар шинах пенсионертуран «Илчи» кказитрал подпискагу дувайшиву.
Москавуллал Культуралул центрданул чулуха «За верность Дагестану» тIисса медальгу дуллунни Назим Щайхаьлиевлун.
Жугу дакIнийхтуну барча буллай буру лакрал цIа адаврай дуручлачисса ва гьаз дуллалисса уссурвал Щайхаьлиевхъул. Зул оьрмулуву ххаришивуртту чIяру даннав, дакIнийсса мурадру бартлаганнав, зу дурсса хъиншивурттал чIиви-хъунсса бутIа Заннал зунмагу, зулацириннангу зана бивтун лякъиннав!
