Шагьрулул бакIчинал Кубокрайнсса КВН

Шагьрулул бакIчинал Кубокрайнсса КВН

Майрал 23-нний МахIач­къалалив, Т. Мурадовлул цIанийсса Дагъусттаннал паччахIлугърал филармониялул Гъинтнилмур майданнив, хьунни МахIачкъала шагьрулул мэрнал Кубокрайнсса КВН. Ва сакин дурну дия МахIачкъала шагьрулул Администрациялул ва Культуралул управлениялул. МахIачкъала шагьрулул мэрнал Кубокрайнсса КВН шамилчинни хъанахъисса.


КВН-лий гьуртту хьуна Аьра­сатнал Кьиблалиясса ряхра хьхьичIунсса команда: МахIачкъала шагьрулул «Порт-Петровск» команда, Ростов-на-Дону шагьрулиясса «Флеш Рояль», Ставрополь шагьрулиясса «Я знаю, ты придешь», Пятигорск шагьрулиясса «Здрасте, здрасте», Ингушетиянавасса «Сборная Хасана Халмурзаева» ва Грозный шагьрулиясса «Сборная ЧГУ» командартту. Шиккува кIицI лаган, инсантал яла чанмур команда дия (увагу кIия инсан) Ингушетиянавамур.

Ростов-на-Дону шагьрулиямур команда МахIачкъалалив цалчин дуркIун дия.
КВН дачин дурну ия Арсен ЛухIуев. Жюрилуву бия МахIачкъала шагьрулул Культуралул управлениялул начальник Фарид Абалаев, «Къиргъу» Компаниярттал группалул генеральный директор АхIмад Муртазялиев, Дагъусттан Республикалул халкьуннал артистка Зайнаб Махаева, Дагъусттаннал паччахIлугърал Аграрный университетрал ректор Зайдин Жамбулатов, «Махачкалинские бродяги» командалул гьурттучи, КВН-лул Высшая лигалул чемпион, Дагъусттан Республикалул лайкь хьусса артист АьбдурахIман Шагьмилов. Бусравсса тамашачитуравух ия МахIачкъала шагьрулул бакIчи Салман Дадаев.

КВН-лул ва ххуллухмур тIуркIу хас бувну бия республикалул хъун шагьрулун цIа дурксса революционер МахIач Дахадаевлул цIа дирзун 100 шин шаврин. Ванийн бувну, ва хьхьунусса хъярчругу бия шагьрулуцIун, шикку ялапар хъанахъисса инсантурацIун бавхIусса.
Фарид Велихановичлул барчаллагь увкуна командарттахь цIу бусса хъярч-махсарарттахлу, кьатIувсса гъарах къабурувгун, рахIатну, ххуйну, ца дуссухун бавтIсса кунна, гьан дурсса чIумухлу.
Ва хьхьуну биялсса хъярчру бия шагьрулул администрациялийн, ванил дуллалисса ва, цалсса хъирив къалавну, дуван къархьумунийн багьайсса. Ванийн бувну, мукунма хъярчирай Салман Дадаевлул увкуна: «БакIрайва суал хIасул хьуна «Циванни цимурца ттун?» тIисса. Махъ, тIурчарив, депутатъталгу дакIнийн бувтунни, министртурайнгума «щунни». Барчаллагь, цукIуй хъамакъаитаврихлу», – куну.

Командарттал дянив хьусса кIирагу конкурсрал хIасиллайн бувну, финалданийн дурккуна Ингушетиянавасса ва Ростов-на-Дону шагьрулиясса командартту. Вайннал дянив хьуми бяст-ччаллайн бувну, МахIачкъала шагьрулул мэрнал Кубок буллуна Ростов-на-Дону шагьрулия­сса «Флеш Рояль» командалун.

Читайте также: