Ансардун цIана 12 шин дур. Ва дуклай ур МахIачкъалаллал 10-мур школалий 6-мур классраву. Спортрахун агьну ур 6 шинаву. Уграт хъанай шин шайхтува, личIи-личIисса бяст-ччаллаву гьуртту хъанай, хьхьичIунсса кIанттурду бугьлан ивкIун ур.
Ансардул хьхьичIунсса кIанттурду бувгьуну бур аьралуннал каний бияврил, ММА-лул бяст-ччаллаву. АРБ-лул турнирду дуллан байбишайхту, вай турнирдайгу ккаккан бувну бур ванал цала бюхъу-хъит.
ЧIивисса оьрмулий Ансардул лайкь дурсса наградартту диялсса дур. Гьарица шинах ванал цалчинсса кIанттурду бугьай Дагъусттаннал чемпионатирттай. Ларгсса шинал Краснознаменск шагьрулий хьусса аьралуннал карунний бияврил Аьрасатнал чемпионатрай Ансардул бувгьуссия цалчинсса кIану. КIицI лаган, Аьбдуллаевхъал агьулданул чиваркI цинявппагу спортрал чулуха итххявхсса буссар. Ансардул буттал ппу Тимур танийвасса альпинист-скалолазри. Дагъусттаннайсса цалчинсса ххассал бувултрал кьюкьраву ивкIссар.
Яла миккува методистну зий уссия. Ппу Шарапуттингу 2-мур даражалул ххассал бувур. Зий ур Дагъусттаннал МЧС-рал ххассал бувултрал кьюкьлуву. Ансардул тренер Кьурбан МахIаммадов лаккучу ур, Уручлатусса.
– Цала даву ххуйну кIулсса, гьунар бусса тренер ур. Хъунмасса бахтти хьунни арс ваначIан агьну. Мартрай Сочилий хьуссия Аьрасатнал чемпионат. Шикку ххув хьунни ванал хIадур увсса шама спортсмен, миннавух Ансаргу. Дунияллул чемпионатрай вайннава кIиннал цалчинсса кIанттурду, цаннал кIилчинсса кIану бувгьунни. Вай ккаккиярттайнугу чIалай бур тренернал даража, – тIий, рязину ур Ансардул ппу Шарапуттин.
ЧIа тIий буру Ансардун уттиния тихуннайгу бюхттулсса ххувшавуртту, тIайлабацIуртту.
