ДакIний-мазрай бакъанува, чIаххувчу къашавай уну тIий, мунал 7 шинавусса оьрчI увцуну лавгссияв тренировкалийн, Аьли Аьлиевлул цIанийсса спортшколалийн. ЧIявучин кIулсса му школа бур МахIачкъалаливсса хъун майданния арх бакъа. Цалчинмур зивулий бур спортзал, кIилчинмуний – личIи-личIисса спортрал снарядру.
Спортрах хъунмасса я бурган буллалисса чIун духьунссия, школа бувну бур хъинну гьартану, чаннану ва ккаккан авурну. ОьрчI шавай уцингу ац1ан багьлай бухьувкун, на кIул хьуссия микку зузисса директорнащал, завучнащал, тренертуращал. Навагу учительну, директорну зий ивкIсса ухьувкун, ми ттущал хъинну хIала бувххуна, гьарца кIанайн иян увунав, ккаккан дуруна цачIатува бувксса чемпионтурал суратру. Ивра оьрчIру тренироват хъанахъисса залданувунгу.
Миву 8-12-15 шиннардил оьрмулул оьрчIащал зий ия Кьубатусса Къуршалиев Маккашарип . Ванал нину дур ТIулизматусса. Кулпат – Хьуриятусса.Ванал ппу ур вара даврий зувирахъул шиннардий зий ивкIсса, чIявусса чемпионтал ва призертал хIадур бувсса АбутIалиб Къуршалиев – цувагу хьхьичIунсса лачIунукку, Аьрасатнал Федерациялул лайкь хьусса тренер.
Хъинну ххуй бивзуна ттун Маккашариплул оьрчIал чулиннайсса аякьа, мюрщисса оьрчIру ваначIан цивппа кIункIу тIий бур. Тренернан кIулли гьарца оьрчIал фамилия, цIа, нину-ппу, цIуллу-сагъшиву. Ванал оьрч1ру, 20-25 минутIрайсса лечин буллай, итххяххан буллай ия. Яла тIурчан, лахьхьин дуллай ия лачIун буккаврил приемру. Махъ тIурчан, оьрчIан хъинну ххирасса баскетбол ягу цамур тIуркIу байсса бия.
Гьаннайсса, ялун личин тIий бур хъиннува гуж бусса ва итххявхсса Дагъусттаннал лачIунбуккулт. ТIайлабацIу вингу, вил мюрщултрангу, Маккашарип!
Аьли Аьлиевлул цIанийсса школалий зузисса цамагу лаккучунащал кIул хьура. Му ур Гъумучатусса Эфендиев Закир. Ва цувагу жул чIурттащири душ бувцусса куяв хъанай ур. Ва шиву зий лявкъукун, на хъинну ххари хьура. Дуклай ва яхъанай ур МахIачкъалалив. Къуртал бувну бур Дагъусттаннал паччахIлугърал педуниверситетрал физкультуралул факультет. Цала захIматрал ххуллу байбивхьуну бур Къазахъисттаннай Уральск тIисса шагьрулий, физкультуралул дарсру дихьлай ва оьрчIан лачIун буккан лахьхьин буллай (тренерну), 2010-ку шинал зана хьуну ур Дагъусттаннайн. ЗакирдучIа бур хъунмур группа. Шиву бур 15-нния 20 шинавун бияннинсса оьрчIру.
ЧIа тIий буру Закирдунгу цIуллушиву ва спортрал давриву хьхьичIуннайшивуртту!
ХIусайн Давыдов, ш.ЧIурттащи
