Аманат
Ца аманатри зухь, лакрал жагьилтал,
Нажагь гъурбатрай ттун бивкIу булурчан,
Ттул гъаривсса нурчIи ласунмур бара
ДакIнин ччи зунттаву кьа къурув дуччин.
Хъуннех чIалачIиний, АхIилу гъанний,
ВацIилу ххал шайний, Гъумук шагьрулий,
Ялун бувкI зулмурду ялтту къявхъ тIиний,
Душманнащал биян цив сакин шайний…
Зунттурдая кьаннайн вай гьай щаращал
Щюлли хьхьирийн щинну диян дан гьайний,
ДакIнин ххира щюлли хъуни зунттурдал
Сангардая къарал гьич чан къашайний.
Дайлсса мисри турду сагънура дуний,
Битан хъин ттупангру хъинну гьарзаний,
Тархъан кьянкьа дакIру духкъалагайний,
БарцIру бугьай ккаччив ций чан къашайний.
Ясир хьунай дишай зулмукарнал мах,
Гъаргъун, оьрчI вирттаврал экьиличайний,
Тархъаншиврул балай щюллисса гьанах
Тархъаншиву ччинал гюргутIи байний.
Духсса макьан
Щюлли барзунттал ялтту бивгьуну лагай лачин,
Майдан ардайн агьукун, нагу дакIнийн булути…
Буттал ххуй багъирдаву балай чан къабай булбул,
Балайлувх, янил чаний, нагу хIала улути…
Бургъил къяртрай бивхьуну, ттуя ссалам бувкIукун,
Зурул чаннащал архIал ттун жаваб гьан дулува…
Гъурбатрай ина дакIний, на рутIайцири мукьал
ХIисав данманах луглай, валлагь, къалякъинссари.
Лакку бизанттайцири марххалтту бассарчангу,
Ттул мукьал аьтарттащал архIал къабацIанссари.
Дунияллул аьлимтал бавтIун, суал барчангу,
Ттул хханххиравцири цIу лещан дан къахьунссари.
Мисриллал пиръаьнтурал таптарду ххал барчангу,
Ттувусса азарданун дарман къалякъинссари.
Ссавнийсса ссурухIиртту аьрщарай ликкарчангу,
Ттул зиялун ларг вирдакI дазин къабюхъанссари.
КьутIпутурал леххаврин ссавнил амру хьурчангу,
Ттул ччаврил дяркъу щинал гьич мякь къалихханссари.
Душманнал дуаьривав, къуртмал дархIу къурхъривав,
Ваксса жува ччай буна, хIайранну личIан бувсса?
Утти, ххуй дус, ттул аьзиз, зухIалул чак буваннин,
Цал ттигу леххав уча, жува цачIун ба куну.
Аьйб мадари
Аьйб мадари, ччисса буттал кIанттурдив,
ЗучIату на ччяни левххун лавгун тIий,
Аьйб мадари зугу, щюлли барзунттив,
Зуяту гъурбатрайн на арх хьуну тIий.
Мяйжанну на ура зуяту архну,
ДакIнин хас бакъасса ухссавнил чулий:
Амма дакI ва аькьлу даинма гъанну
Зуя аьтIий бикIай дяхтта ва хьхьувай.
КIюрххил лавай ивзун, чани ххал хьувкун,
ХьхьичIра-хьхьичI зул сурат ттун чIалан дикIай.
Ттунма хавар бакъа зухух лавгукун,
Хъювхъу тIий, иттату макь цирда дачай.
Ялтту бучIу ттуя, аьзизсса миллат,
Виха дансса даву къадурна лирчIри,
Душмантал сававрай гъурбатрайн агьну,
Жан дакъа вин дулун цичIав къалирчIри.
Ларгунни тти гай чIунну
Бакъар тти хъуни дяъвив,
Лавг вирттаврал замана,
ХьхьичIва кунма чил чуллайн
Аьрал давлардай гьайсса.
Ларгунни тти тай чIунну,
Бувккунни ххуй ххяххабаргъ,
Уссурвал, цачIун хьуну,
Бачи архIал чаннайнмай.
Зунттай бивщу ятIул ттугъ
Бувгьуну аслан канил,
Бачи, шалий ша бизлай,
Циняв иттипакьну зун.
ЧантI уку, жагьил Къапкъаз,
Тархъаншиврийн хъит уча!
Вила тархъан хьу оьрчIан
ТIитIа тти хъун дарваза.
Цурдалусса дакI
Щюллисса чIапIи къяртрайх бишлай бур,
Буран бияннин,
Язугъсса вирдакI гъаргъун гьавай дур,
На ятин хьуннин…
Оьккисса мурчал лавсун лавгунни
Ттул щюлли чIапIи,
КIа архну лагайхту, аьтIун диркIунни
КIа бивкIсса къяртри…
Ясирну лавгукун, жагьилсса ххира
Душман-ссибирлив,
КъааьтIий ци бави – навалу бура
КIинттул дяхьхьунив.
Жайран
ДакI ххаллилсса жайран, лахъ барзунттал оьрчI
ЧIявуну ккаккай ттун микIирал зунчай,
Дахьра кIюрххил ритай гъинтнил хьхьемнияр
Пай-ххай тIий бикIай кIа кIай хъуни мачIай.
Алмасрал таж кунма жайраннул ялув –
НякI ссавнийх гьавайсса марххала – Дултти,
Жайраннул ччаннава лагьну гилу лув
Щаращивгу бачай лухIи ратIавух.
Пашманну ялугьий кIий жагьил жайран,
Пикрирдал бувцIуну, чуннив буруглай,
Ттуруллувх ххал буллай га лувсса майдан,
ХIисав шай гилунал дардирдал ай-гьай…
Мааьсив шара, ттул аьшукьсса жайран,
Дунияллул дардру чIалай дур куну,
Дард дакъа дуниял вай махлукьуннан
ЧIаланссия, барххуй, хъинну куклуну.
Гъинттул
Дунияллул кьудрат зияда хьунни,
Хъуру, зунтту, ахъру давлатлув бунни,
Мурхьру буцIин бунни щюллисса чIапIал,
ОьрчIи тIутIал арду чIюлу дурунни.
Гьарта хьунни къушан щюлли авлахъру
ТIуркIу тIун бивкIунни чавахъ марцI щинай,
Диллай дур ахъулсса лахъсса мурхьирдай,
Биявай бур чIаллу мюрщи хъуруннай.
Гьанав цулуцултрал гюргутIи балай,
ДакIру гьарта дуллай, ххалав оьвтIий бур,
Дастта-дастта дурну, ххулувгу бичлай,
КIайннал байл чIиникIру хьхьев-хьхьев тIий най бур..
