Майрал 25-нний ДР-лул ХIукуматрал председательнал цалчинма хъиривчу Руслан Аьлиевлул каялувшиврий хьунни Дагъусттаннал ХIукуматрал батIаву. Руслан Аьлиевлул бусаврийну, хьхьичIмур кьини Рутуллал ва Дахадаевуллал районнай, гужсса гъараллу ларчIун, ххуллурдай лекьрурду хьуну диркIун дур.

Республикалул транспортрал ва ххуллурдал хозяйствалул министр Жамбулат Салавовлул тIимунийну, Рутуллал райондалий, Гелмец ва Къина тIисса шяраваллал дянивсса ххуллий лекьру хьуну, 13 шяравалу лирчIун дия машинартту гьан къабюхълай. Хъиривмур кьини кIикку кIюрххила байбивхьуну бур ххуллу бакьин буллай. Зий дур техника, 16 ссятраву тIитIин тIий бур ххуллу. Дахадаевуллал райондалийгу зий бур ххуллу бакьин баврил давурттаха.