Май зурул 24-нний Дагъусттаннал КIулшиву дулаврил ва элмулул министерствалул конференц-залдануву хьунни дуклаки оьрчIал ва студентътурал советрал заседание. Ваний гьуртту хьунни министр ЯхIия Бучаев ва ванал хъиривчу Аида ТIалхIатова. Дуккаврил шинал хIасиллу дуллай, вайннал гьаз бунни патриот тарбиялул даврицIун бавхIусса масъалартту.
«Цаппара дуккаврил идарарттаву тарбиялул даву лащинсса даражалий дур, дуклаки оьрчIругу цIанасса тагьардания щялусса информация ккалай бур соцсетирттай», – увкунни министрнал.
Аида ТIалхIатовалгу бувсунни тамансса учреждениярттай тарбиялул даву ххаралунсса диркIшиву. Дуклаки оьрчIал ва студентътурал советрал члентурал бувсунни цивппа дуклакисса кIанттурдай цукунсса даву дуллай бивкIссарив.
– Сайки гьарца кулпатраву, агьулданий ухьунссия Буттал кIанттул цIанийсса дяъвилий гьуртту хьусса виричу. ЦIанакул, Украиннай спецоперация нанисса ппурттувугу, Дагъусттаннай бушиву къакIулли тийх маччачу, гъанчу, шяравучу, чIаххувчу акъасса кулпат. Тарих ххуйну къакIулшивруватур инсантурал бяйкьусса пикрирду нанисса. Халкьуннан къакIулну бунуккар жулва ппухълу цукунсса иширттавун багьну бивкIссарив. Тарбиялул даву дагьайкунсса даражалийн гьаз дуван аьркинссар ва тарихрал хIакьмур лахьхьин буллан, бувчIин буллан аьркинссар, – увкунни Советрал председательнал хъиривчу Даниял Шабановлул.
