Майрал 25-нний хьунни ДР-лул строительствалул ва ЖКХ-лул министр Артур Сулаймановлул пресс-конференция. Министрнал ва мунал хъиривчу А.Нестеревлул бувсунни республикалул инсантал бигьалагайсса кIанттурдай дузалшинну дувансса объектирдахлу чIурду булаврил хIакъираву.
Миннал бувсмунийн бувну, апрельданул 15-нния майрал 30-ннийнин Аьрасатнал шагьрурдай инсантал бигьалагайсса кIанттурду бакьин бувну, дузалшиндарайн буцаврихлу чIурду буллай бур (онлайн- голосование за благоустройство городской среды). Дузалшин дуллан тIий бур жямат бигьалагайсса кIанттурдай: сквердаву, хьхьирил зумардацIух, кучардаву, паркирдаву. ЧIурду булун бюхълай бур гьарца 14 шинава ливчусса аьрасатлувнаща. ЧIурду булайсса платформалий ккаккан бувну бур Дагъусттаннал циняв шагьрурдай дузал бувансса 72 кIану. Ми кIанттурдава чIурду чIявусса буллуми дузал буллан тIий бур цалчин ярглий 2023-ку шинал.
Дагъусттаннал шагьрурдай ялапар хъанахъисса 78 азара инсаннал чIурду буллуну бур цанма дузалшин дурну ччисса объектирдахлу.
ЧIурду буллалиссар «Формирование комфортной городской среды» проектрал ва «Жилье и городская среда» нацпроектрал лагрулий. Артур Сулаймановлул бувсунни мукунма ларгмур шинал мура программалийну циксса давуртту дурну диркIссарив.
