ДР-лул ХIукуматрал председательнал 1-ма хъиривчу Манвел Мажонцлул каялувшиврий хьунни ЦIуссалакрал райондалия цIусса миналийн бизан бувсса лакрал захIматсса масъаларттан хас дурсса батIаву. Муний гьуртту хьуминнал ххал бивгьунни цIусса миналийсса шяраваллу щинал дузал даврил, ЦIуссаккуллал шяраву щин марцI дайсса сооруженияртту зузи баврил, мукунма бизан баврил программалийну къатри даврил масъалартту.
Манвел Мажонцлул тIимунийну, щин марцI дайсса сооруженияртту цила чIумал зий байбишаврийну бюхъантIий бур ххуйсса хIачIайсса щинал дузал дуван цIусса миналийсса чIярусса шяраваллу. Мунал тапшур бунни яла гъансса чIумал объект булун ЦIуссалакрал райондалул балансрайн.
«Ва объектрал райондалун дуссар ляличIисса агьамшиву, на тапшур буллай ура циняв жаваблувсса сакиншиннардайн даву анавар дуккан дуван ва объект зий байбишин буван ккаккан дурсса чIумал»,- кунни Манвел Мажонцлул. Цалчинма вице-премьернал мукунма тапшур бунни хIачIайсса щин ишла даврил ялув бацIаву дуллан. «ХIачIайсса щин къабучIиссар ахъаву, теплицардаву дургьусса ххяххиярттайн дихьлан, автомойкардаву ишла дуллан»,- кунни мунал.
Лак цIусса миналийн бизан баврил ХIукуматрал Управлениялийн тапшур бунни республикалул бюджетравату итадакьайсса арцу щаллуну ишла дуван.
БатIаврий гьуртту хьунни ДР-лул ХIукуматрал ЦIуссалакрал райондалийсса лак цIусса миналийн бизан баврил ва Аухуллал район уттара дуккан даврил Управлениялул хъунама ХIажи Султанов, ЦIуссалакрал райондалул администрациялул бакIчи МахIаммад-ХIажи Айдиев, «Новострой» дирекциялул зузалт ва цаймигу жаваблувсса къуллугъчитал.
