Майрал 23-нний ДР-лул ХIукуматрал председатель Аьбдулмуслим Аьбдулмуслимовлул каялувшиврий хьунни Дагъусттаннал экономикалул цIакьсса лябукку щаллу баврил Оператив штабрал батIаву. ХIукуматрал Председательнал тIимунийну, Оператив штабрал даву дурган дурну дур къадусъсса билаятирттал ишла дурсса ссуссукьушивурттал биян бувсса зараллу бухлаган баврийн.

Аьбдулмуслим Аьбдулмуслимовлул бувсмунийну, республикалий чан дурну дур бизнесрал аралувусса ххалбигьавуртту.
«Дагъусттаннал прокуратуралул диялсса чан дурну дур бизнесрал аралувусса ххал бигьавурттал (хъирив лаявурттал) аьдад. Гьашинусса шинал ххал бигьавурттал аьмсса план хIадур дуллалисса чIумал 2100 ххал бигьаву дукьан дурну диркIссар», – кунни премьер-министрнал.
ДР-лул ХIукуматрал Председательнал тIимунийну, Дагъусттаннал БакIчи Сергей Меликовлул тапшурлугърайн бувну, республикалий ххал бигьлай бур МСП-лул субъектирттан кумаг бувансса чаранну.

ХIукуматрал приоритет: властьрал органнал ва бизнессообществалул дянив аьчухсса гъалгъа гьарта ва гужлан бавур.
Аьбдулмуслим Аьбдулмуслимовлул властьрал органнал каялувчитурайн ва шагьрурдал ва районнал бакIчитурайн оьвчаву дунни бизнесращал аьчухну гъалгъа тIун.
«ЦIанасса ппурттуву приоритетирттавасса ца хъанахъиссар властьрал органнал ва бизнес-сообществалул дянив аьчухсса ихтилат гужлан ва гьарта баву, личIи-личIисса структурардаву хIасул хъанахъисса сиптарду, ччясса мутталий ххалгу диргьуну, щурущи дулланшиврул экономикалул ва социал иширттаву кIантту-кIанттурдай», – кунни премьер-министрнал.
Яла экономикалувусса тагьарданул хIакъираву махъ лавхъунни ХIукуматрал Председательнал цалчинма хъиривчу Руслан Аьлиевлул. ХIаллихшиннал кредитру ласаврил хIакъираву ихтилат бунни ДР-лул промышленностьрал ва машлул министр Низам Халиловлул.
БатIаврий ихтилатру бунни мукунма ДР-лул Ишбажаранчишиврул ва инвестициярттал агентствалул каялувчи ХIажи-Мурад Абашиловлул, ДР-лул шяраваллил хозяйствалул ва бакIлахъиялул министр Мухтарбий Аджековлул ва цайминалгу.