Майрал 25-нний ДР-лул БакIчи Сергей Меликов Каспийскалий хьунаавкьунни Туризмалул федерал агентствалул каялувчи Зарина Догузоващал. Миннал ххал диргьунни республикалул туризмалул каширду ва ми лядуккан даврил масъалартту.
«Дагъусттан цIанасса ппурттуву бур яла машгьурмур регион: Майрал байраннал чIумал республикалийн бувкIун бия хIатта Ккавкказуллал Минеральные Воды шагьрулийнияр чIявусса туристътал. Жунма цачIу аьркинни хIарачат буван ччясса мутталий туристшиврул инфраструктура лядуккан дуван, цанчирча Дагъусттаннайн бучIан ччими ялу-ялун гьарза хъанай буну тIий», – кунни Ростуризмалул каялувчинал.
Хьунабакьаврий кьутIи чирчунни ДР-лул ХIукуматрал, Туризмалул Федерал агентствалул ва «Фунсун» ва «Интурист» тIисса туристътурал оператортурал дянив хIала-гьурттуну зузаврил хIакъираву.
Сергей Меликовлул бувсунни цIанасса ппурттуву туристътуран ва федерал туроператортуран хъин бизлай бушиву региондалий бигьалагаву, шиккусса кIанттурду, гьава. Мунал тIимунийну, апрельданул 30-нния «Интурист» туроператорнал тIиртIуну дур региондалийнсса чартерданул программа, мунил лагрулий дур машгьурсса кIанттурдайнсса туристътурал маршрутру.
Июльдания махъ тIитIлай бур «Фунсун»тIисса туроператорнал чартерданул программа. Республикалул каялувчинал барчаллагь кунни Ростуризмалухь туристътурал бизнесран паччахIлугърал чулухасса кумагран субсидияртту итабакьаврихлу ва Дагъусттаннай чартердал программа дузал даврихлу.
Зарина Догузовал тIимунийну, хIакьину туризм хъанай дур билаятрал чIявуми регионнансса стратегиялул ара, миннувух Ккавкказуллал регионнангу: «Туризм лядуккан даврийну бюхълай бур дузал буван азарвахъул зузи кIанттурду, тамансса мюнпат биян буван экономикалун».
Мунил мукунма бувсунни туризм Дагъусттаннай лядуккан дуваншиврул цукунсса давуртту дуван аьркинссарив Ростуризмалул, ялагу цукунсса кумаг буван бюхълай буссарив Дагъусттаннан. Догузовал бувсунни хIадурну бушиву ми давуртту дуллай байбишин.
Хьунабакьаврий махъ лавхъунни мукунма «Фунсун» ООО-лул гендиректор Тарас Демурал ва «Туроператор Интурист» ООО-лул гендиректор Виктор Тополкараевлул.
