Виричунал цIанийсса школалий бивщунни Хъиривппа-хъиривсса гюнгутIи

Виричунал цIанийсса школалий бивщунни Хъиривппа-хъиривсса гюнгутIи

Кьабивтунни ххюра шинава тIитIинсса «хияллал конвертругу»


Май зурул 25-нний хьунни Къизилюртуллал райондалийсса Совет Союзрал Виричу ХIажи Бугъановлул цIанийсса Султанянгиюртуллал (Хъанардал) 2-мур школалий Махъва-махъсса гюнгутIул мажлис.


Гьашину Хъанардал школалул 11-мур класс къуртал буллай бур 31 оьрчI, 9-мур – 67. Вайннаву 8 ур медальданийн нанисса ва 14 – ххювардай школа къуртал буллалисса.
Хъанардал 2-мур школа тIивтIуссар 2011-ку шинал. ЦIанасса выпускгу ва школалул цалчинсса выпуск хъанай бия. Школалул хIаят кIюрххила, тIутIавун дахьлаган дурну, чанна лахъан дурну дия чIюлуну лархсса выпускниктурал, миннахь ххуллухъин чин бувкIсса нитти-буттахъал.

ОьрчIру цIусса оьрмулул ххуллийн тIайла буккан бувкIун бия Къизилюртуллал райондалул бакIчи Рустам Татарханов, райондалул КIулшивуртту дулаврил управлениялул вакил Оксана ХIасанова, Къизилюртуллал райондалул Культуралул ва туризмалул отделданул хъунама, Султанянгиюртуллал администрациялул бак1чинал хъиривчу Тимур Къандалаев, Дагъусттаннал халкьуннал артист ХIажилав ХIажилаев ва цаймигу.

Хъанардал школалул 11»б» классрал выпуск

– Ххирасса оьрчIрув, школалий дуклакисса шиннардий зу ккаккан бунни дуккавриву итххявхсса, яхI-къирият дусса, хъунанал хIурмат бусса, ххуйну тарбия бувсса оьрчIру бушиву. Ттун щак бакъар зу, гихунмайгу зула оьрму мукунма лайкьну бутлай, школалул цIа бюхттул даншиврий.
Школа лайкьну дуручлай буссар Совет Союзрал Виричу ХIажи Бугъановлул цIагу. Учалагу бур, цIаниха лавхьхьу­сса бикIайссар жамилул аьрххи тIисса. Гьашинусса выпускниктуравасса ПатIимат Гарушеван, къанавравун оькьлакьисса чIивисса оьрчI ххассал увну тIий, дуллунни «Оькьлакьима ххассал аврихлу» тIисса медаль. Ца ялагу жула выпускник ХIажимурад Мурадов хьунни закканттай буккаврил (тайский бокс) Европанал ва дунияллул чемпион. На чIа тIий ура зун гихунмайсса оьрмулуву хьхьичIуннайшивуртту ва ххувшавуртту, – увкунни школалул директор Шамил Аьбдулахидовлул.

Директорнал, завучнал ва классирттал каялувчитурал грамотартту дуллунни дуккавриву ва школалул оьрмулуву ххуйсса ккаккияртту чIалачIи дурсса, олимпиадарттай, спортраву хьхьичIунсса кIанттурду бувгьусса оьрчIан.
Выпускниктурахь тIайла­бацIу чIа тIутIисса, асар хьунсса ихтилатру бунни 11-ми классирттал каялувчитурал – Индира Оьмаровал ва Сабина ХIамзатхановал, цалчинсса учительницахъал, нитти-буттал.

11 «б» классрал каялувчи Сабина ХIамзатханова
выпускникнащал

– Школалия лавгун махъсса оьрмулувугу захIматшивуртту дакъа къадикIантIиссар. КIулну бикIияра, аьркинсса чIумал зул чIарав бацIан, маслихIат бан жу мудан хIадурссару. Школалул нузру зун мудан тIиртIуссар. Жу дакIнийхтуну ххари шару, жула оьрчIая ххуйсса хаварду бавсса чIумал. Хъуннасса вихшала дур зугу жува ххари булланссару тIисса, – увкунни Индира Оьмаровал.
Цахьра дарсру дирхьусса учительтурахь барчаллагь тIисса бюххансса махъругу увкуну, миннан хас бувсса шеърирду бувккунни ва балайрду увкунни школа къуртал буллалиминналгу.
Аьдатравун багьсса куццуй, Махъра-махъсса занг рирщуну махъ цалчинмур классрал дуклаки оьрчIал, ххуллухъин тIий, тIутIал кацIру буллунни выпускниктурахьхьун. Вайнналгу мюрщиминнан цала чулухасса бахшишру дунни.

Ахирданий, выпускниктурал дунни школалия личIи хъанахъисса вальс, ккаккан бунни школалул оьрмулун хас бувсса сценарий, гьаваллавун итабавкьунни хьхьиру ва кIяласса шарду.
Выпускниктурал байрандалул сий гьаз дунни цIанихсса балайчи, Дагъусттаннал халкьуннал артист ХIажилав ХIажилаевлул балайрдал.
Утти выпускниктуран багьлай бур ца уттигу бигьа бакъасса шачIану лахъан – ЕГЭ-рду дуллуну, дуклан буххан. Учительтурал бусласимунийн бувну, Хъанардал школалул гьашинусса выпускниктал бур ляличIинува яргсса, итталун багьлагьисса, дуккавриву итххявхсса, личIи-личIисса гьунарду бусса. Щак бакъар вайннал ттиния тихунмайсса оьрмулувугу лайкьсса кIану бугьаншиврийн.

Цила выпускниктал классравун бавтIун, Индира Оьмаровал дирхьунни насихIатру бусласисса махъра-махъсса классрал ссят. БавчIунни выпускниктурайх цала-цала хияллу чивчусса чагъарду бишинсса конвертру. КьутIи дунни вай конвертру ххюра шинава хьунабавкьусса чIумал тIитIин.

Андриана Аьбдуллаева,
Имара Саидова

Аватар

Андриана Абдуллаева

Андриана Абдуллаева

Читайте также: