Учитель, вил пиша яла аьркинмурди

«Учитель». Нава школалий дуклакисса чIумал ва махъ оьрчIал зумату «зеххин» ччан бикIайва, ганал цалла цIагу, буттал цIагу учаву циваннив къаишлану дикIайва школалий.
Шиккува кIицI лаган ччива нава Дарбантлив яхъанахъисса чIумал хIисав хьусса ванихава лавхьхьусса иш. Дарс дишайсса учитель унугу, акъанугу, личIишиву дакъа, инава хIурмат буван ччисса инсан хьунаавкьукун, Азирбижаннал миллатрал инсантурал, ганал ка дугьлагьийни, цIанил ялун ххи байва «муаьллим» тIисса махъ, яни ганал чулийнмайсса цала хIурмат хъиннува чIалачIи буллалисса мяъналий.


Ттул ва ххуллухсса ихтилат Ккуллал 2-мур школалул учитель Губулов Кьурбан МахIмудлул арснаятуссар. На Ккуллал райондалийн «Илчи» кказитрал корреспондентну зун увкIсса чIумал Кьурбан зий ия Ккуллал райондалул КIулшиву дулаврил управлениялул каялувчину. Ттун га чIумала Кьурбаннуй хъинну дакI даркьуна. Циван учирча, ттула даврил ялув ганащал хьунаакьин, ихтилат буван багьлагьисса чIумал, «чIун да­къар» къатIий, цува хьхьичIну лагайссияв ганал кабинетравун.
Май зурул 17-нний МахIмудов Кьурбаннун бартлагунни 60 шин.


На тIайланма учинна, ва уттисса, аваза­сса, анаварну нани­сса, оьрмулул ишир­ттаву чара бакъа школалий аьркинну ур ­психолог-учитель.


Ва хIуччагу хIисаврай буну, хьунаавкьура ванащал.
Ккуллал жяматрал дянив ва­найн кутIану ва ччаву дуну «Ко­ля» учай. Ванал ппу Ма­хIмуд сайки бусса оьрмулий, жард къакуну, зий ивкIун ур Ккуллал колхозрал машиналий щупирну. Нину Халисатгу мукунма, зий, захIмат буллай бивкIун бур мура колхозраву. Щаллагу республикалийх цIа дурксса С. Габиевлул цIанийсса колхозрал кутакраву вайнналмур бутIагу бур. Кьурбаннул ур кIия уссу – ХIусайн ва Юсуп. ХIусайн ур Къизлардал райондалул азарханалий реаниматологну ва анестезиологну. Юсуп ур хирург-травматолог. Зий ур Дагъусттаннал Ортопедиялул ва травматологиялул центрданий хъунама хIакиннал хъиривчуну.

Буси учав Кьурбаннухь цаятува.
– На 1980-ку шинал къуртал бувссар Ккуллал цалчинмур школа. Яла увхссияв Да­гъусттаннал Педагогикалул институтравун, чил мазурдил факультетрайн. Вагу бувккуну, ингилис ва немецнал мазурдил дарсру дишайсса учитель хьуссара. ТIайлассар, дуклакисса шинну цахъи лахъи ларгуна. Ттун багьуна академический отпуск ласун. Увцунав яла армиялийн къуллугъ буллан. Мунийн бувну, институт къуртал бувссар 1988-ку шинал. Ккуллал райондалийн учIайхту, зун тIайла ув­ккунав Хъювхъиял школалийн, ингилис мазрал дарсру дихьлан. Ца ду­ккаврил шин ларгун махъ, школарттай цIусса дахханашивуртту хьуну, оьрчIру тарбия бавриву, гайннан кIулшиву дулавриву аьркин хъанан ивкIуна психолог. Мунияту на ялагу, переквалификация дуван, дуклан гьан увунав ттула институтравун. КIира шинава зана хьуну, на зий уссияв Ккуллал кIилчинмур школалий учитель-психологну.

– Кьурбан, жува школалий дуклакийни мукун­сса дарс къадикIайвахха, му ци багьана хьуну ду­ккан дурсса дарсну хьу­ссар?
– Бунияла, жува дуклакийни къаикIайва психолог-учитель. ХIукуматрал бакI дургьуминнан, дуккаврил аралуву гьарта-гьарзасса ишру хIисавравун ласласиминнан бувчIуну бухьун­ссия ялун нанисса никиран аьркин хъанантIий ушиву психолог-учитель. Му бакъассагу, дуккавриву агьамну бикIай оьрчIал шаппасса микро-климатрал ишгу. На тIайланма учинна, ва уттисса, авазасса, анаварну нанисса, оьрмулул иширттаву чара бакъа школалий аьркин­сса учитель хъанай ур му. Ттунгу нава зузисса мутталий багьайва оьрчIал хасиятру ттириркIуну, гайннан нахIуну, цалла дакIругу тIитIин дурну, школалий хьуннав, шаппа хьуннав къуццу тIунсса маслихIатру буван. Му ишгу ттущава бювхъусса кунма чIалан бикIай. На ва психологнал даврий зий дур­ссар 16 шин, яни 2007-ку шинайн ияннин. На яла Ккуллал райондалул КIулшиву дулаврил управлениялул хъунаману ивтунав.

– Инава му къуллугърай зузисса чIумул му­тталий ци дуван бювхъуна вища?
– Аьрасатнал хIукуматрай дакъа, гьарца кIанттайра хъинну анаварну дарчуна ком­пьютердацIун дархIусса давуртту. Ми зузи къабувну хъанай бакъая чIумун лархьхьу­сса кIулшивуртту оьрчIан дуллан. Учебникру бакъассагу, дурккуна дискардай чирчусса, оьрчIал кIулшиву гьарта-гьарза дуллансса, личIи-личIисса темардан хас дурсса дарсругу. Ттуща бювхъуна, райондалий­сса циняв школартту компьютердал щаллу бувну, дарсру дишаврил ишру хъит учин буван. Дур­ккуна мукунна интерактив доскардугу. Миннуйнугу, оьрчIахь учительнал бувсмурнияр, яруннин чIалачIимур зат дакIний личIайсса бухьувкун, ххуй чулиннайсса ккаккияртту хьуна. Учительтал, дуклаки оьрчIру гьуртту хъанан бивкIуна личIи-личIи-личIисса конкурсир­ттавух. Бувгьуна чIявуссаннал хьхьичIунсса кIанттурду.
Муния мукьах на, жагьилминнан ххуллу буллуну, кIура авссияв ттула школалийн учительну зун. Ккуллал кIилчинмур школалий зий ура завучну. Ттуйн тапшур дунни информатикалул давурттугу.
– Кьурбан, буси, чан-кьансса бухьурчагу, вила кулпатраятугу.
– Ттул оьрмулул дуснайн учайссар Уммугьани куну. Ва цуппагу зий буссар школалий дук­ра дувуну. Жул дянив бур кIива душ ва арс. Душ Аксана бур бухгалтер-экономист. Марианна тIимур хIакин бур. Арс Аьли зий уссар ЦIуссалакрал райондалул полициялий. Га цувагу хIаписарди. Бур ххюва оьрчIал оьрчI.
– Барчаллагь, Кьурбан, ихтилат бувансса чIун ляркъуну тIий. Барча вил дяликIулувун лавхъсса шиннугу. Яраппий, вихьхьун цIуллушиву дулуннав, дуллалимуницIун кабакьиннав! Учитель, вил пиша яла аьркинмурди!