Эбратрансса кулпатру

Эбратрансса кулпатру

ЦIуссалакрал райондалий­сса КЦСОН-данул (Агьалинахасса социал къуллугърал центрданул) дунни Кулпатрал кьинилун хас дурсса мероприятие.
Шиккун оьвкуну бия чIя­русса шиннардий нахIу-хIалимну цачIу оьрму бутлатисса кулпатирттайн.

ЦIуссалакрал райондалий, байран кьинирдай бакъассагу, кулпатирттахасса кьадру-кьимат мудангу лавайсса бур. ДР-лул ЗахIматрал ва социал лябуккулул министерствалул зузалтралгу диялсса къулагъас дуллай бур кулпатирттал ахIвал-хIал лавай баврих.

Мажлис хьунни райондалул Культуралул къатраву. ЧIярусса шиннардий эбратну оьрму бутлатисса кулпатирттавух бия 47 шинай цачIу ялапар хъанахъисса Закаржа ва Ровзат МахIаммадовхъул, 37 шинай цачIу ялапар хьусса Салман ва Исамат Аурбиевхъул, 49 шинай цачIу ялапар хъанахъисса Рукман ва Зайнади Оздарбиевхъул, 48 шинай цачIу ялапар хъана­хъисса Аьлимирза ва Сагъират Мирзаевхъул, 24 шинай цачIу ялапар хъанахъисса Арсен ва Забират ХIабиевхъул.

Мукунма, Центрданийн оьвкуну бия Украиннаву аьрали операциялуву гьуртту хъанай бивкIсса аьралитурал кулпатирттайнгу – Аьйшат Расуловайн, Майсарат МахIаммадовайн ва аьралинал нину Жарият Устаевайн.

Мажлисрайн бувкIминнал бувсунни цала кулпатирттавусса тарбиялул даврия, аьдат-эбадатирттая. Культуралул къатлул зузалтрал увкунни хъамаллуран балайрду.
Эбратну ва лайкьну оьрму бутлатисса кулпатирттан хас дурсса мероприятиялул сакиншинначиталну бия КЦСОН-далул директор Малика Жамхатова, райондалул администрациялул бакIчинал хъиривчу Гъаирбаг Мусаев ва Культуралул къатрал директор Башарат Айгунова.
Байрандалий гьуртту хьунни ЦIуссалакрал райондалул прокурор Светозар Оьмаров ва мунал кумагчи Имран Ибрагьимовгу.

Аватар

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: