ТАСС информациялул федерал агентствалий хьунни гьарца шинал дувайсса щалагу Аьрасатнал «Библионочь» акциялун хас дурсса пресс-конференция.
28 мазрай ва 70 лугъатрай гъалгъа тIисса, цимирагу сипат дусса аслийсса культура фольклорданувугу, литературалувугу, канил пишардавугу, багьу-бизулул цайми-цайми ххуллу-ххуттардийгу ккаккан дурсса Дагъусттаннан гьашинумур «Библионочь» акциялул тема ляличIинура гъансса, чара бакъа аьркинсса дур.
Гьашинумур акция цукун, ци шадлугъирттайну дувантIиссарив бусласисса батIаврий гьуртту хьунни Аьрасатнал Культуралул министерствалул Регионал политикалул, кIулшиву дулаврил ва проектрал каялувшиндарал департаментрал директорнал хъиривчу Лидия Федякина, Москав шагьрулул Культуралул департаментрал каялувчи Александр Кибовский, Аьрасатнал паччахIлугърал библиотекалул генеральный директор, «Библионочь» акциялул куратор Вадим Дуда, Аьрасатнал паччахIлугърал оьрчIал библиотекалул директор Мария Веденяпина, Дагъусттан Республикалул культуралул министр Зарема Буттаева ва м.ц.
Гьашинумур «Библионочь» акциялул тема дур «ПроТрадиции», яни библиотекарду, музейрду ва цаймигу идарартту буслантIий бур Аьрасатнал халкьуннал культуралул ирсирая.
Дагъусттаннал культуралул идарарттал ва акциялийннин хIадур дурмуния бувсуна Зарема Буттаевал. Цилва ихтилатраву ванил кIицI лавгуна 28 мазрай ва 70 лугъатрай гъалгъа тIисса, цимирагу сипат дусса аслийсса культура фольклорданувугу, литературалувугу, канил пишардавугу, багьу-бизулул цайми-цайми ххуллу-ххуттардийгу ккаккан дурсса Дагъусттаннан гьашинумур «Библионочь» акциялул тема ляличIинура гъансса, чара бакъа аьркинсса душиву. Министрнал бусласимунийн бувну, «Библионочь» ва «Библиосумерки» акциярттавух хьхьичIунну гьуртту хьунтIиссар МахIачкъала ва Каспийск шагьрурдал модельный библиотекарттугу. Ва бакъассагу, акциялул сиптачитуран гьашину ччай бур ва давривух хIала буван луттирдал ттучанну ва луттирдал коллекцияртту бусса хъун бакъасса каферду.
Гьашину Петр Первый увну 350 шин ва ванал «Персидский походран» 300 шин хъанай душивугу хIисаврайн лавсун, акциялул лагрулий дуллалисса шадлугъирттай вай иширттангу лайкьсса кIану ккаккан бувну бусса бур.
